మోగిన తెలంగాణలో మున్సిపల్ ఎన్నికల నగారా.. పూర్తి షెడ్యూల్ ఇదే!

హైదరాబాద్, జనవరి 27: తెలంగాణ రాష్ట్రంలో మున్సిపల్ ఎన్నికల సందడి మొదలైంది. 116 మున్సిపాలిటీలు, 7 మున్సిపల్ కార్పొరేషన్లకు సంబంధించిన 2026 సాధారణ ఎన్నికల షెడ్యూల్‌ను రాష్ట్ర ఎన్నికల కమిషనర్ రాణి కుముదిని అధికారికంగా విడుదల చేశారు.

ఈ ఎన్నికల ప్రక్రియ ద్వారా రాష్ట్రవ్యాప్తంగా 52 లక్షల 43 వేల మంది ఓటర్లు తమ ఓటు హక్కును వినియోగించుకోనున్నారు. ప్రజాస్వామ్య పండుగలో ప్రతి ఒక్కరూ భాగస్వాములు కావాలని, తప్పనిసరిగా ఓటు హక్కును వినియోగించుకోవాలని ఈ సందర్భంగా రాష్ట్ర ఎన్నికల కమిషనర్ ప్రజలకు విజ్ఞప్తి చేశారు.

ఎన్నికల షెడ్యూల్ ప్రకారం, జనవరి 28 నుంచి నామినేషన్ల స్వీకరణ ప్రారంభం కానుంది. అభ్యర్థులు జనవరి 30వ తేదీ సాయంత్రం 5 గంటల వరకు నామినేషన్లు దాఖలు చేయవచ్చు.

జనవరి 31న నామినేషన్ల పరిశీలన చేపట్టి, అర్హత పొందిన అభ్యర్థుల జాబితాను అదే రోజు ప్రకటిస్తారు.

ఫిబ్రవరి 3 మధ్యాహ్నం 3 గంటల వరకు నామినేషన్ల ఉపసంహరణకు గడువు ఉండగా, అనంతరం తుది అభ్యర్థుల జాబితా విడుదల చేయనున్నారు.

---

మున్సిపల్ ఎన్నికల కీలక తేదీలు ఇవే:

• నామినేషన్ల ప్రారంభం: 28-01-2026
  (ఉదయం 10:30 నుంచి సాయంత్రం 5:00 వరకు)

• నామినేషన్ల ముగింపు: 30-01-2026
  (సాయంత్రం 5:00 గంటల వరకు)

• నామినేషన్ల పరిశీలన: 31-01-2026

• నామినేషన్ల ఉపసంహరణ గడువు: 03-02-2026
  (మధ్యాహ్నం 3:00 గంటల వరకు)

• పోలింగ్ తేదీ: 11-02-2026
  (ఉదయం 7:00 నుంచి సాయంత్రం 5:00 వరకు)

• ఓట్ల లెక్కింపు: 13-02-2026
  (ఉదయం 8:00 గంటల నుంచి)

• ఫలితాల ప్రకటన: ఓట్ల లెక్కింపు పూర్తైన వెంటనే