మరికొన్ని గంటల్లో వివాహం… పెళ్లి బట్టల్లోనే వరుడు ఆత్మహత్య
హైదరాబాద్లో విషాదకర ఘటన చోటుచేసుకుంది. మరికొన్ని గంటల్లో వివాహ బంధంలో అడుగుపెట్టాల్సిన యువకుడు, పెళ్లి దుస్తుల్లోనే ఆత్మహత్య చేసుకోవడం కలకలం రేపింది.
పోలీసుల వివరాల ప్రకారం… అనంతపురం జిల్లా పుట్లూరు మండలం చెర్లోపల్లి గ్రామానికి చెందిన లోకేష్ (29) గత కొంతకాలంగా హైదరాబాద్లోని చింతల్ ప్రాంతంలో నివసిస్తున్నాడు. ఫార్మా కంపెనీలో పనిచేసే సమయంలో అంబిక అనే యువతితో పరిచయం ఏర్పడి, అది ప్రేమగా మారింది. ఇరు కుటుంబాల అంగీకారంతో వీరి వివాహాన్ని శనివారం ఆర్యసమాజ్ లేదా ఆలయంలో నిర్వహించేందుకు సిద్ధమయ్యారు.
వివాహ ఏర్పాట్ల కోసం శుక్రవారం కేపీహెచ్బీ పరిధిలోని అడ్డగుట్టలో ఓ హోటల్ గదిని అద్దెకు తీసుకున్నారు. గదిలోకి వెళ్లిన అనంతరం లోకేష్ పెళ్లి దుస్తులు ధరించాడు. అనంతరం తనకు ఆకలిగా ఉందని చెప్పి అంబికను భోజనం తీసుకురావడానికి బయటకు పంపించాడు.
అంబిక తిరిగి వచ్చేసరికి గది తలుపులు లోపల నుంచి మూసి ఉన్నాయి. పలుమార్లు పిలిచినా స్పందన లేకపోవడంతో హోటల్ సిబ్బందికి సమాచారం ఇచ్చింది. తలుపులు పగలగొట్టి చూడగా, లోకేష్ ఫ్యాన్కు ఉరివేసుకుని కనిపించాడు. వెంటనే ఆసుపత్రికి తరలించినప్పటికీ, అతడు అప్పటికే మృతి చెందినట్లు వైద్యులు తెలిపారు.
మరణానికి కొద్దిసేపటి ముందు తన అన్నయ్య ప్రకాశ్కు “మిస్ యూ” అని వాట్సాప్ సందేశం పంపినట్లు పోలీసులు గుర్తించారు. అయితే ఆత్మహత్యకు గల కారణాలు ఇంకా తెలియరాలేదు. ఉద్యోగ సమస్యలేమైనా ఉన్నాయా? ఆర్థిక ఒత్తిడేనా? లేదా వ్యక్తిగత కారణాలేమైనా ఉన్నాయా? అనే కోణాల్లో పోలీసులు దర్యాప్తు చేస్తున్నారు.
ఈ ఘటనతో చెర్లోపల్లి గ్రామంలో విషాద ఛాయలు అలుముకున్నాయి. పెళ్లి పీటలెక్కాల్సిన యువకుడు ఇలా అర్థాంతరంగా ప్రాణాలు కోల్పోవడం పట్ల కుటుంబ సభ్యులు, గ్రామస్తులు ఆవేదన వ్యక్తం చేస్తున్నారు.
Post a Comment