జూన్ 2 నుంచి యమునా నది పుష్కరాలు ప్రారంభం

హైదరాబాద్, మే 29: హిందూ సంప్రదాయంలో పుష్కరాలకు విశిష్టమైన ఆధ్యాత్మిక ప్రాధాన్యం ఉంది. దేవగురువు బృహస్పతి ఒక రాశి నుంచి మరొక రాశిలోకి ప్రవేశించినప్పుడు, ఆ రాశికి సంబంధించిన పవిత్ర నదికి పుష్కర మహోత్సవాలు నిర్వహించడం ఆనవాయితీ.

ప్రతి నదికి 12 సంవత్సరాలకు ఒకసారి పుష్కరాలు వస్తాయి. గురుడు కర్కాటక రాశిలోకి ప్రవేశించే సందర్భంలో ఈసారి యమునా నది పుష్కరాలు జరగనున్నాయి. ఈ పుణ్యకాలంలో దేశం నలుమూలల నుంచి లక్షలాది మంది భక్తులు యమునా తీరం చేరుకుని పవిత్ర స్నానాలు, పూజలు, దానధర్మాలు నిర్వహిస్తారు.

పుష్కరాల్లో తొలి 12 రోజులను ఆది పుష్కరాలు, చివరి 12 రోజులను అంత్య పుష్కరాలుగా పరిగణిస్తారు. ఈ సమయంలో యమునా నదిలో స్నానం చేయడం ద్వారా పాప విమోచనం కలుగుతుందని, పితృదోషాలు తొలగుతాయని భక్తుల విశ్వాసం.

ఈ ఏడాది యమునా పుష్కరాలు జూన్ 2న ప్రారంభమై జూన్ 13తో ముగియనున్నాయి. భక్తుల రద్దీ దృష్ట్యా పలు రాష్ట్ర ప్రభుత్వాలు ప్రత్యేక ఏర్పాట్లు చేస్తున్నాయి.