కోరుట్ల బస్టాండ్‌లో ఆర్టీసీ బస్సు చోరీ.. పోలీస్ వాహనం సహా పలు వాహనాలను ఢీకొట్టిన దుండగుడు

 

కోరుట్ల బస్టాండ్‌లో ఆర్టీసీ బస్సు చోరీ.. పోలీస్ వాహనం సహా పలు వాహనాలను ఢీకొట్టిన దుండగుడు

జగిత్యాల జిల్లా, కోరుట్ల: జగిత్యాల జిల్లా కోరుట్ల బస్టాండ్‌లో సంచలన ఘటన చోటుచేసుకుంది. బస్టాండ్‌లో నిలిపి ఉంచిన తెలంగాణ ఆర్టీసీ బస్సును ఓ దుండగుడు అకస్మాత్తుగా దొంగిలించి వేగంగా తీసుకెళ్లాడు. బస్సును నిర్లక్ష్యంగా నడుపుతూ మార్గమధ్యంలో పోలీస్ వాహనం సహా పలు వాహనాలను ఢీకొట్టడంతో పలువురు గాయపడినట్లు సమాచారం. ఈ ఘటనతో స్థానికంగా తీవ్ర భయాందోళనలు నెలకొన్నాయి.

బస్సు దొంగిలించబడిన విషయం తెలుసుకున్న ఆర్టీసీ సిబ్బంది వెంటనే పోలీసులకు సమాచారం అందించారు. అప్రమత్తమైన పోలీసులు బస్సును వెంటాడుతూ దుండగుడిని అడ్డుకునేందుకు ప్రయత్నించారు. అయితే అతడు వేగంగా బస్సును నడుపుతూ పలుచోట్ల వాహనాలను ఢీకొడుతూ నిజామాబాద్ వైపు దూసుకెళ్లాడు.

ఈ క్రమంలో నిజామాబాద్ మార్గంలోని హనుమాన్ దేవాలయం సమీపానికి చేరుకోగానే బస్సు అదుపుతప్పి రోడ్డుపక్కనున్న గుంతలోకి దిగి నిలిచిపోయింది. దీంతో బస్సు నుంచి దిగిన దుండగుడు అక్కడి నుంచి పారిపోవడానికి ప్రయత్నించాడు. అయితే వెంటనే స్పందించిన పోలీసులు అతడిని వెంబడించి అదుపులోకి తీసుకున్నారు.

నిందితుడిని మెట్‌పల్లి పోలీస్ స్టేషన్‌కు తరలించి విచారణ చేపట్టారు. అతడు బస్సును ఎందుకు దొంగిలించాడు? ఘటన వెనుక ఉన్న కారణాలు ఏమిటి? అనే కోణంలో పోలీసులు దర్యాప్తు చేస్తున్నారు.

ఈ ఘటనలో గాయపడిన వారికి సమీప ఆసుపత్రుల్లో చికిత్స అందిస్తున్నారు. ఘటనకు సంబంధించిన పూర్తి వివరాలు ఇంకా తెలియాల్సి ఉంది. పోలీసులు కేసు నమోదు చేసి దర్యాప్తు కొనసాగిస్తున్నారు.