నీట్‌ పరీక్ష రేపే… రాష్ట్రవ్యాప్తంగా పకడ్బందీ ఏర్పాట్లు

హైదరాబాద్‌, మే 2: దేశవ్యాప్తంగా వైద్య విద్యలో ప్రవేశాల కోసం నిర్వహించే నీట్‌ యూజీ-2026 పరీక్ష ఆదివారం జరగనుంది. ఈ నేపథ్యంలో తెలంగాణ రాష్ట్రంలో పరీక్ష నిర్వహణకు ప్రభుత్వం, నేషనల్‌ టెస్టింగ్‌ ఏజెన్సీ (ఎన్‌టీఏ) సమన్వయంతో విస్తృత ఏర్పాట్లు పూర్తి చేసింది.

ఈ ఏడాది రాష్ట్రం నుంచి మొత్తం 73,084 మంది అభ్యర్థులు దరఖాస్తు చేసుకోగా, వారి కోసం 24 జిల్లాల్లో 199 పరీక్ష కేంద్రాలు ఏర్పాటు చేశారు. గత ఏడాదితో పోలిస్తే అభ్యర్థులు, కేంద్రాల సంఖ్య రెండూ పెరిగాయి. పరీక్ష మధ్యాహ్నం 2 గంటల నుంచి సాయంత్రం 5 గంటల వరకు జరుగుతుంది. అభ్యర్థులు కనీసం అరగంట ముందుగానే కేంద్రాలకు చేరుకోవాలని అధికారులు సూచించారు.

పెన్‌ అండ్‌ పేపర్‌ (ఓఎంఆర్‌ షీట్‌) విధానంలో జరిగే ఈ పరీక్షలో మొత్తం 180 ప్రశ్నలు ఉంటాయి. సరైన జవాబుకు 4 మార్కులు, తప్పు జవాబుకు 1 మార్క్‌ తగ్గింపు ఉంటుంది. మొత్తం పరీక్ష 720 మార్కులకు జరుగుతుంది. ఫిజిక్స్‌, కెమిస్ట్రీ తలా 45 ప్రశ్నలు, బయాలజీ (బోటనీ, జువాలజీ) నుంచి 90 ప్రశ్నలు ఉంటాయి.

దేశవ్యాప్తంగా 556 పట్టణాల్లో, విదేశాల్లో 14 కేంద్రాల్లో పరీక్ష నిర్వహిస్తున్నారు. రాష్ట్రంలో పరీక్షా కేంద్రాలను ప్రధానంగా ప్రభుత్వ విద్యాసంస్థల్లోనే ఏర్పాటు చేశారు.

భద్రత కట్టుదిట్టం… సీసీ కెమెరాల నిఘా

పరీక్ష నిర్వహణలో ఎలాంటి అవాంఛనీయ సంఘటనలు చోటుచేసుకోకుండా ప్రభుత్వం కఠిన చర్యలు చేపట్టింది.

ప్రతి ఐదు కేంద్రాలకు ఒక సివిల్‌ నోడల్‌ ఆఫీసర్‌
ప్రతి కేంద్రానికి ప్రత్యేక పోలీసు అధికారి
డ్యూయల్‌ లేయర్‌ ఫ్రిస్కింగ్‌
సీసీటీవీ పర్యవేక్షణ
బయోమెట్రిక్‌ వెరిఫికేషన్‌, జామర్లు

ప్రశ్నపత్రాల రవాణా, భద్రత పూర్తిగా పోలీసు నిఘాలో జరుగుతోంది. జిల్లాల వారీగా కంట్రోల్‌ రూమ్‌లు ఏర్పాటు చేసి, సమస్యలు తలెత్తితే వెంటనే ఎన్‌టీఏకు తెలియజేసేలా చర్యలు తీసుకున్నారు.

ఇక అభ్యర్థులకు వారి చిరునామా ఆధారంగా సమీప కేంద్రాలను కేటాయించడం జరిగింది. ఈసారి అమ్మాయిలకు ప్రాధాన్యత ఇచ్చి కేంద్రాల కేటాయింపు చేపట్టారు.