డాన్స్ మాస్టర్ పండుకు ఘోర రోడ్డు ప్రమాదం.. రెండు కాళ్లకు ఫ్రాక్చర్

 డాన్స్ మాస్టర్ పండుకు ఘోర రోడ్డు ప్రమాదం.. రెండు కాళ్లకు ఫ్రాక్చర్

తెలుగు టెలివిజన్ రంగంలో ప్రముఖ కొరియోగ్రాఫర్‌గా గుర్తింపు పొందిన పండు మాస్టర్ ఘోర రోడ్డు ప్రమాదానికి గురయ్యారు. విశాఖపట్నం జిల్లాలో అర్ధరాత్రి సమయంలో జరిగిన ఈ ప్రమాదంలో ఆయనకు రెండు కాళ్లకు తీవ్ర గాయాలు కాగా, ఫ్రాక్చర్లు అయినట్లు సమాచారం.

ఆనందపురం మండలం లోడగలవారిపాలెం జాతీయ రహదారిపై ఈ ప్రమాదం చోటుచేసుకుంది. హైవేపై ఇప్పటికే ఆగి ఉన్న రెండు వాహనాలను అతివేగంగా వచ్చిన బొలెరో కోళ్ల వ్యాన్ బలంగా ఢీకొట్టడంతో ప్రమాదం సంభవించింది. ఢీకొన్న ప్రభావంతో వాహనాలు తీవ్రంగా దెబ్బతిన్నాయి.

ఈ ఘటనలో పండు మాస్టర్‌కు రెండు కాళ్లకు తీవ్ర గాయాలు కాగా, ఆయనతో పాటు ప్రయాణిస్తున్న మరో ముగ్గురు వ్యక్తులకు స్వల్ప గాయాలైనట్లు తెలిసింది. ప్రమాదం జరిగిన వెంటనే స్థానికులు, పోలీసులు సహాయక చర్యలు చేపట్టి క్షతగాత్రులను సమీప ఆసుపత్రికి తరలించారు. ప్రస్తుతం పండు మాస్టర్ వైద్యుల పర్యవేక్షణలో చికిత్స పొందుతున్నారు.

ప్రాథమిక విచారణలో డ్రైవర్ నిద్రమత్తు, అలాగే వాహనం అతివేగంగా నడపడం ప్రమాదానికి ప్రధాన కారణాలుగా పోలీసులు అనుమానిస్తున్నారు. ఘటనాస్థలానికి చేరుకున్న పోలీసులు ప్రమాదానికి గురైన మూడు వాహనాలను స్వాధీనం చేసుకుని పరిశీలించారు.

ఈ ఘటనపై కేసు నమోదు చేసి దర్యాప్తు చేపట్టిన పోలీసులు ప్రమాదానికి దారితీసిన ఖచ్చితమైన కారణాలను తెలుసుకునే ప్రయత్నం చేస్తున్నారు. ఈ వార్త తెలిసిన వెంటనే పండు మాస్టర్ అభిమానులు, టీవీ పరిశ్రమకు చెందిన పలువురు ప్రముఖులు ఆయన త్వరగా కోలుకోవాలని ఆకాంక్షిస్తున్నారు.