నేటి నుంచి పోలీసు ఉద్యోగాలకు దరఖాస్తులు

హైదరాబాద్‌, ఆగస్టు 19: తెలంగాణ రాష్ట్రంలో పోలీసు, అనుబంధ విభాగాల్లో ఖాళీగా ఉన్న 7,437 ఉద్యోగాల భర్తీకి దరఖాస్తుల ప్రక్రియ బుధవారం నుంచి ప్రారంభమైంది. తెలంగాణ రాష్ట్ర స్థాయి పోలీసు నియామక బోర్డు (టీజీపీఆర్‌బీ) ఆధ్వర్యంలో చేపడుతున్న ఈ నియామక ప్రక్రియలో భాగంగా అభ్యర్థులు ఆన్‌లైన్‌లో దరఖాస్తు చేసుకోవచ్చు. అధికారిక వెబ్‌సైట్‌ tgprb.in ద్వారా ఆగస్టు 19 ఉదయం 8 గంటల నుంచి సెప్టెంబర్‌ 9 సాయంత్రం 5 గంటల వరకు దరఖాస్తులు స్వీకరించనున్నారు.

ఈ నియామకాల్లో పోలీసుశాఖతో పాటు స్పెషల్‌ ప్రొటెక్షన్‌ ఫోర్స్‌ (ఎస్‌పీఎఫ్‌), ఫైర్‌ సర్వీసెస్‌, జైళ్ల శాఖలోని వివిధ పోస్టులను భర్తీ చేయనున్నారు. సబ్‌ ఇన్‌స్పెక్టర్‌ (సివిల్‌, ఏఆర్‌, టీజీఎస్పీ), అసిస్టెంట్‌ సబ్‌ ఇన్‌స్పెక్టర్‌ (ఫింగర్‌ ప్రింట్‌ బ్యూరో), సివిల్‌, ఏఆర్‌ కానిస్టేబుల్‌ పోస్టులతో పాటు ఫైర్‌ ఫైటర్లు, స్టేషన్‌ ఫైర్‌ ఆఫీసర్లు, జైలు వార్డర్లు, డిప్యూటీ జైలర్‌ తదితర పోస్టులు ఇందులో ఉన్నాయి.

మొత్తం ఖాళీల్లో 3,697 సివిల్‌ కానిస్టేబుల్‌ పోస్టులు ఉండటం విశేషం. ప్రభుత్వం ఈసారి అభ్యర్థుల వయోపరిమితిని పెంచడంతో దరఖాస్తుదారుల సంఖ్య భారీగా పెరిగే అవకాశం ఉందని అధికారులు భావిస్తున్నారు.

ఆధార్‌ ఫేస్‌ అథెంటికేషన్‌ తప్పనిసరి

దరఖాస్తు ప్రక్రియలో అక్రమాలకు తావులేకుండా పారదర్శకతను పెంచేందుకు ఈసారి ఆధార్‌ ఆధారిత ఫేస్‌ అథెంటికేషన్‌ను తప్పనిసరి చేశారు. అభ్యర్థులు తమ మొబైల్‌ ఫోన్లలో ముందుగానే ఆధార్‌ యాప్‌ను డౌన్‌లోడ్‌ చేసుకుని సిద్ధంగా ఉంచుకోవాలని అధికారులు సూచించారు.

రెండు దశల్లో దరఖాస్తు

ఆన్‌లైన్‌ దరఖాస్తు ప్రక్రియను పార్ట్‌–1, పార్ట్‌–2గా నిర్వహించనున్నారు. మొదట అభ్యర్థులు తమ మొబైల్‌ నంబర్‌తో నమోదు చేసుకోవాలి. అనంతరం విద్యార్హత ధ్రువపత్రాలు, కుల, నివాస ధ్రువీకరణ పత్రాలు, పాస్‌పోర్ట్‌ సైజు ఫొటో, సంతకాన్ని నిర్దేశిత పరిమాణంలో అప్‌లోడ్‌ చేయాల్సి ఉంటుంది.

దరఖాస్తు చివరి తేదీ వరకు వేచి చూడకుండా అర్హతకు సంబంధించిన అన్ని ధ్రువపత్రాలను సిద్ధంగా ఉంచుకుని వీలైనంత త్వరగా దరఖాస్తు చేసుకోవాలని అధికారులు సూచించారు. సకాలంలో దరఖాస్తు ప్రక్రియను పూర్తి చేసుకున్న అభ్యర్థులు తమ విద్యార్హతలు, అర్హతలకు అనుగుణంగా పోస్టులకు పోటీ పడవచ్చు.