పెళ్లి పేరుతో మహిళకు మోసం.. మరో మహిళను పెళ్లి చేసుకున్న వ్యక్తిపై కేసు

హైదరాబాద్: పెళ్లి చేసుకుంటానని నమ్మించి, ఇద్దరు పిల్లల తల్లితో సన్నిహితంగా మెలిగి.. చివరకు మరో మహిళను వివాహం చేసుకున్నాడంటూ ఓ వ్యక్తిపై మహిళ పోలీసులను ఆశ్రయించిన ఘటన హైదరాబాద్‌లోని మాసబ్‌ట్యాంక్ పోలీస్ స్టేషన్ పరిధిలో వెలుగులోకి వచ్చింది. బాధితురాలి ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు.

పోలీసులు తెలిపిన వివరాల ప్రకారం.. 35 ఏళ్ల బాధిత మహిళ పరిశ్రమలో షూటింగ్ ఈవెంట్స్ వర్కర్‌గా పనిచేస్తోంది. ఈ క్రమంలో ఆమెకు మహమ్మద్ మతీన్, మహమ్మద్ ఆమిర్‌తో పరిచయం ఏర్పడింది. ఆ పరిచయం ప్రేమగా మారడంతో 2013లో మతీన్‌ను వివాహం చేసుకుంది. ఈ దంపతులకు ఇద్దరు పిల్లలు ఉన్నారు. అయితే దాంపత్య జీవితంలో విభేదాలు తలెత్తడంతో 2023 డిసెంబర్‌లో ఖులా ద్వారా మతీన్‌తో ఆమె విడిపోయింది.

విడాకుల అనంతరం ఆమిర్ తనకు మరింత దగ్గరయ్యాడని బాధితురాలు ఫిర్యాదులో పేర్కొంది. తన గత వైవాహిక జీవితం, ఇద్దరు పిల్లల గురించి మొదటి నుంచే తెలిసిన ఆమిర్.. తనను పెళ్లి చేసుకుంటానని, పిల్లల బాధ్యతను కూడా తీసుకుంటానని నమ్మించాడని ఆరోపించింది.

ఆమిర్ మాటలను నమ్మిన ఆమె 2024 నుంచి 2026 మధ్య సుమారు ఏడుసార్లు అతనితో కలిసి హోటళ్లకు వెళ్లినట్లు ఫిర్యాదులో తెలిపింది. త్వరలోనే పెళ్లి చేసుకుంటానని పదేపదే హామీ ఇవ్వడంతో అతడిని నమ్మి శారీరక సంబంధానికి అంగీకరించినట్లు పేర్కొంది.

అయితే తాను పెళ్లి చేసుకోబోయే వ్యక్తిగా భావించిన ఆమిర్ ఇప్పటికే మరో మహిళను వివాహం చేసుకున్నట్లు సుమారు నెల రోజుల క్రితం తెలిసిందని బాధితురాలు తెలిపింది. దీంతో తీవ్రంగా ఆందోళనకు గురైన ఆమె.. పెళ్లి చేసుకునే ఉద్దేశం లేకపోయినా హామీ ఇచ్చి తనను శారీరక సంబంధానికి ఒప్పించాడని ఆరోపిస్తూ పోలీసులను ఆశ్రయించింది. అతడి మాటలను నమ్మి తాను తీవ్ర మానసిక వేదనకు, అవమానానికి గురయ్యానని ఫిర్యాదులో పేర్కొంది.

పోలీస్ స్టేషన్‌కు చేరిన ‘పెళ్లి పంచాయితీ’

ఈ వ్యవహారంపై బాధితురాలు ఆగస్టు 5న మాసబ్‌ట్యాంక్ పోలీసులకు ఫిర్యాదు చేసింది. ఫిర్యాదు స్వీకరించిన పోలీసులు క్రైమ్ నంబర్ 165/2026 నమోదు చేశారు. BNS సెక్షన్లు 69, 318(2) కింద కేసు నమోదు చేసి దర్యాప్తు చేపట్టారు.

బాధితురాలు చేసిన ఆరోపణలు, ఆమిర్ ఇచ్చినట్లు చెబుతున్న పెళ్లి హామీ వెనుక ఉద్దేశం ఏమిటి? మొదటి నుంచే పెళ్లి చేసుకునే ఉద్దేశం లేకుండా ఆమెను నమ్మించాడా? లేక పరిస్థితులు మరోలా మారాయా? అనే అంశాలను పోలీసులు విచారిస్తున్నారు.

పెళ్లి హామీ ఇచ్చి మోసం చేశాడన్న మహిళ ఆరోపణలు దర్యాప్తులో నిర్ధారణ కావాల్సి ఉంది. పోలీసులు సేకరించే ఆధారాలు, ఇరువర్గాల వాంగ్మూలాల ఆధారంగా తదుపరి చర్యలు తీసుకునే అవకాశం ఉంది.