హిజాబ్‌పై నిర్ణయించడానికి జడ్జీలు ఎవరు?.. హైకోర్టు తీర్పుపై ఒవైసీ ఆగ్రహం

హైదరాబాద్: పాఠశాలలో హిజాబ్ ధరించేందుకు అనుమతి నిరాకరిస్తూ అలహాబాద్ హైకోర్టు ఇచ్చిన తీర్పుపై ఎంఐఎం అధినేత, హైదరాబాద్ ఎంపీ అసదుద్దీన్ ఒవైసీ తీవ్ర ఆగ్రహం వ్యక్తం చేశారు. ఈ తీర్పును ఇస్లాంపై దాడిగా అభివర్ణించిన ఆయన.. ఇస్లాంలో ఏది ముఖ్యమైన మతాచారమో నిర్ణయించే అధికారం న్యాయమూర్తులకు లేదని వ్యాఖ్యానించారు.

“ఇది మా మతం. ఏది అవసరమో మేమే నిర్ణయించుకుంటాం. నిర్ణయించడానికి న్యాయమూర్తులు ఎవరు?” అని ఒవైసీ ప్రశ్నించారు. ఇస్లాంకు ఏది ముఖ్యమో, ఏది ముఖ్యం కాదో నిర్ణయించడం న్యాయస్థానాల పని కాదని అన్నారు.

హిజాబ్‌పై పిటిషన్ కొట్టివేత

ప్రయాగ్‌రాజ్‌లోని ఓ ప్రైవేట్ పాఠశాలలో చదువుతున్న విద్యార్థిని.. స్కూల్ యూనిఫామ్‌కు అదనంగా హిజాబ్ ధరించేందుకు అనుమతించాలని, అందుకు విద్యాసంస్థను ఆదేశించాలని కోరుతూ అలహాబాద్ హైకోర్టును ఆశ్రయించింది. ఈ పిటిషన్‌ను ఆగస్టు 21న జస్టిస్ జేజే మునీర్, జస్టిస్ ఇంద్రజీత్ శుక్లాలతో కూడిన ధర్మాసనం కొట్టివేసింది.

ఇస్లాంలో మహిళలు హిజాబ్ ధరించడం తప్పనిసరి మతాచారం కాదని హైకోర్టు తన తీర్పులో స్పష్టం చేసింది. ఈ నేపథ్యంలోనే ఒవైసీ కోర్టు తీర్పుపై తీవ్ర అభ్యంతరం వ్యక్తం చేశారు.

రాజ్యాంగ హక్కుల ఉల్లంఘన: ఒవైసీ

హైదరాబాద్‌లో జరిగిన ఓ కార్యక్రమంలో ఒవైసీ మాట్లాడుతూ.. అలహాబాద్ హైకోర్టు తీర్పు రాజ్యాంగంలోని ఆర్టికల్ 19, ఆర్టికల్ 25కు విరుద్ధంగా ఉందని ఆరోపించారు. మత స్వేచ్ఛకు సంబంధించిన అంశాలపై సుప్రీంకోర్టులో కీలక విచారణలు జరుగుతున్న సమయంలో ఇలాంటి తీర్పు వెలువడటం సరికాదని అన్నారు.

ఈ తీర్పు వల్ల ఉత్తరప్రదేశ్‌లోని ముస్లిం బాలికల విద్యపై ప్రతికూల ప్రభావం పడే అవకాశం ఉందని ఒవైసీ ఆందోళన వ్యక్తం చేశారు. బాలికలను చదువుకు దూరం చేసే పరిస్థితులు ఏర్పడకూడదని అన్నారు.

‘మోడీ వారికంటే గొప్ప దేశభక్తుడా?’

వందేమాతరం వివాదంపై కూడా ఒవైసీ స్పందించారు. ప్రధాని నరేంద్ర మోదీ.. తుర్రేబాజ్ ఖాన్, రవీంద్రనాథ్ ఠాగూర్, నేతాజీ సుభాష్ చంద్రబోస్, మహాత్మా గాంధీ వంటి స్వాతంత్ర్య సమరయోధుల కంటే గొప్ప దేశభక్తుడా? అని ప్రశ్నించారు.

భారతదేశ ప్రగతి కోసం కృషి చేస్తూనే ముస్లింలు తమ మత విశ్వాసాల్లో స్థిరంగా ఉంటారని ఆయన అన్నారు. దేశభక్తిని నిరూపించుకోవడానికి మత విశ్వాసాలతో రాజీపడాల్సిన అవసరం లేదని పేర్కొన్నారు.

ఆర్ఎస్ఎస్, బీజేపీపై విమర్శలు చేసిన ఒవైసీ.. ఈ దేశం అందరిదని అన్నారు. భారత రాజ్యాంగ పీఠిక ‘భారత మాత’ అంటూ ప్రారంభం కాదని, ‘భారతదేశ ప్రజలమైన మేము’ అనే భావనతో ప్రారంభమవుతుందని గుర్తుచేశారు.