ఆదివాసీ నర్సు శీరీష మృతిని తీవ్రంగా ఖండిస్తున్నాం పూణెం శ్రీనివాస్
నిందితుడు సానద్ ఉల్లా ఖాన్పై సమగ్ర దర్యాప్తు చేపట్టాలి.. కఠినంగా శిక్షించాలి: పూణెం శ్రీనివాస్
ములకలపల్లి, సెప్టెంబర్ 1: భద్రాద్రి కొత్తగూడెం జిల్లా ములకలపల్లి మండలం చవిటిగూడెం గ్రామానికి చెందిన ఆదివాసీ యువతి, నర్సు ఊకే శీరీష మృతి అత్యంత విషాదకరమని కాంగ్రెస్ నాయకులు పూణెం శ్రీనివాస్ అన్నారు. శీరీష మృతిని ఆధార్ సొసైటీ, AEWCA, AMCS, ASFతో పాటు ఆదివాసీ మహిళా సంఘాలు, ఆదివాసీ విద్యార్థి సంఘాల తరఫున తీవ్రంగా ఖండిస్తున్నట్లు తెలిపారు.
ప్రాణాలను కాపాడేందుకు నర్సుగా సేవలందించిన ఆదివాసీ ఆడబిడ్డ శీరీష ప్రాణాలు కోల్పోవడం సమాజాన్ని తీవ్రంగా కలచివేసిందని శ్రీనివాస్ ఆవేదన వ్యక్తం చేశారు. మారుమూల అటవీ ప్రాంతం నుంచి ఉద్యోగం కోసం హైదరాబాద్కు వచ్చిన యువతికి రక్షణ లేకపోవడం బాధాకరమన్నారు.
శీరీష మృతికి కారణమని ఆరోపణలు ఎదుర్కొంటున్న సానద్ ఉల్లా ఖాన్పై పోలీసులు ఎలాంటి పక్షపాతం లేకుండా సమగ్ర దర్యాప్తు చేపట్టాలని ఆయన డిమాండ్ చేశారు. ఘటనకు సంబంధించిన ప్రతి ఆధారాన్ని సేకరించి, వాస్తవాలను వెలుగులోకి తీసుకురావాలని కోరారు. నిందితుడిపై ఆరోపణలు రుజువైతే చట్టప్రకారం అత్యంత కఠినమైన శిక్ష విధించాలని, బాధిత కుటుంబానికి న్యాయం జరిగేలా ప్రభుత్వం చర్యలు తీసుకోవాలని అన్నారు.
బాధిత కుటుంబానికి అండగా ఉంటాం
శీరీష కుటుంబం ఒక కుటుంబ సభ్యురాలిని మాత్రమే కోల్పోలేదని, సమాజానికి సేవ చేసే ఒక విలువైన ప్రాణాన్ని కోల్పోయిందని శ్రీనివాస్ అన్నారు. ఈ ఘటనపై ప్రభుత్వం, పోలీసు యంత్రాంగం నిర్లక్ష్యంగా వ్యవహరిస్తే ప్రజల్లో న్యాయవ్యవస్థపై నమ్మకం దెబ్బతింటుందని హెచ్చరించారు.
శీరీష కుటుంబానికి న్యాయం జరిగే వరకు ఆధార్ సొసైటీ, AEWCA, AMCS, ASF, ఆదివాసీ మహిళా సంఘాలు, ఆదివాసీ విద్యార్థి సంఘాలు వారి తరఫున బలంగా నిలబడతాయని స్పష్టం చేశారు.
మహిళల భద్రతకు ప్రత్యేక చర్యలు
మహిళల రక్షణకు రాష్ట్ర ప్రభుత్వం ప్రత్యేక దృష్టి సారించాలని పూణెం శ్రీనివాస్ కోరారు. ముఖ్యంగా నర్సులు, రాత్రి వేళల్లో విధులు నిర్వహించే ప్రభుత్వ, ప్రైవేటు సంస్థల మహిళా ఉద్యోగులకు పూర్తి భద్రత కల్పించేలా ప్రత్యేక చర్యలు చేపట్టాలని డిమాండ్ చేశారు. రాత్రి షిఫ్టుల్లో పనిచేసే మహిళల కోసం సురక్షిత రవాణా, పని ప్రదేశాల్లో భద్రత, అత్యవసర సమయంలో తక్షణ పోలీసు సహాయం వంటి చర్యలను మరింత పటిష్టం చేయాలని సూచించారు.
ఇలాంటి ఘటనలు పునరావృతం కాకుండా ప్రభుత్వం కఠినమైన భద్రతా చర్యలు చేపట్టాలని, మహిళలకు రక్షణ కల్పించడంలో ఎలాంటి నిర్లక్ష్యానికి తావు ఇవ్వకూడదని అన్నారు.
ఈ కార్యక్రమంలో లక్ష్మిదేవిపల్లి సర్పంచ్ తాటి అనిత, తిరులేష్, AEWCA జిల్లా అధ్యక్షులు పోలేబోయిన వెంకటేశ్వర్లు, వర్కింగ్ ప్రెసిడెంట్ వర్స లక్ష్మణ్, మలకం స్వామి, తోలెం వెంకటేశ్వర్లు, పెండెకట్ల రామనాధం, పూనెం సమ్మయ్య, గోగ్గేలా నాగేశ్వరరావు, కొమరం పాపారావు, చీమల అచ్చయ్య, తాటి సూరయ్య, కుంజా లక్ష్మి నారాయణ, ATF అధ్యక్షులు పాయం ఆనందరావు, ATA అధ్యక్షులు బీజ్జ శ్రీను, తుడుందెబ్బ, ఆదివాసీ సంక్షేమ పరిషత్ నాయకులు తెల్లం నర్సింహారావు తదితరులు పాల్గొన్నారు.
Post a Comment