ఎస్సీ వర్గీకరణ జరిగే వరకు ఉద్యోగ పరీక్షా ఫలితాలను నిలిపివేయాలి

 

భద్రాద్రి కొత్తగూడెంలో ఎస్సీ వర్గీకరణకు మద్దతుగా నిరసన

ఎస్సీ వర్గీకరణ జరిగే వరకు ఉద్యోగ పరీక్షా ఫలితాలను నిలిపివేయాలి

భద్రాద్రి కొత్తగూడెం జిల్లా, కొత్తగూడెం టౌన్‌లో మాదిగ రిజర్వేషన్ పోరాట సమితి (ఎమ్మార్పీఎస్) ఆధ్వర్యంలో నిరసన కార్యక్రమం నిర్వహించబడింది. "ఎస్సీ వర్గీకరణ జరిగే వరకు ఉద్యోగ పరీక్షా ఫలితాలను నిలిపివేయాలి" అనే డిమాండ్‌తో స్థానిక పోస్టాఫీస్ సెంటర్ వద్ద పెద్ద ఎత్తున ఆందోళన చేపట్టారు.

ఈ నిరసన కార్యక్రమాన్ని ఎమ్మార్పీఎస్ జిల్లా ప్రధాన కార్యదర్శి దాసరి శ్రీనివాస్ మాదిగ ఆధ్వర్యంలో నిర్వహించారు. ఇందులో జిల్లా ఎమ్మార్పీఎస్ గౌరవ అధ్యక్షుడు కొత్తపల్లి సోమయ్య మాదిగ, ఎంఎస్ఎఫ్ జిల్లా ప్రధాన కార్యదర్శి చెంగల గురునాథ మాదిగ, ఎమ్మార్పీఎస్ జిల్లా కో-కన్వీనర్ వంగూరు రామ్మూర్తి మాదిగ, పుల్లురి కుమార్ మాదిగ, ఎంఎస్ఎఫ్ జిల్లా విద్యార్థి విభాగం దాసరి సారధి మాదిగ, జై శ్రీను మాదిగ తదితరులు పాల్గొన్నారు.

వర్గీకరణ లేకుండా ఉద్యోగ నియామకాలు అన్యాయమని విమర్శ

ఈ సందర్భంగా నాయకులు మాట్లాడుతూ, "గౌరవ పద్మశ్రీ కృష్ణ మాదిగ గారి పిలుపు మేరకు, ఎమ్మార్పీఎస్ రాష్ట్ర కమిటీ ఆదేశానుసారం ఈ నిరసన కార్యక్రమాన్ని నిర్వహిస్తున్నాం" అని తెలిపారు. ఎస్సీలను వర్గీకరించి ఏబిసిడిలుగా విభజించిన తర్వాతనే ఉద్యోగ నోటిఫికేషన్లు విడుదల చేయాలని వారు డిమాండ్ చేశారు.

ఆగస్టు 1న సుప్రీంకోర్టు ఇచ్చిన తీర్పు మేరకు రాష్ట్ర ప్రభుత్వాలకు ఎస్సీ వర్గీకరణ చేసేందుకు అధికారముందని పేర్కొన్నారు. తెలంగాణ సీఎం రేవంత్ రెడ్డి కూడా శాసనసభలో వర్గీకరణ అమలుచేస్తామని ప్రకటించారని, కానీ అదే సమయంలో టీజీపీఎస్సీ గ్రూప్-1, గ్రూప్-2, గ్రూప్-3 పరీక్షల ఫలితాలు ప్రకటించేందుకు సిద్ధమవుతోందని ఆరోపించారు. ఇలా జరిగితే మాదిగలు తీవ్ర అన్యాయానికి గురవుతారని ఆందోళన వ్యక్తం చేశారు.

పరీక్షా ఫలితాలు నిలిపివేయకపోతే ఉద్యమం

నాయకులు "వర్గీకరణ ఫలితాల దశలో ఉన్న ఈ సమయంలో, ఉద్యోగ ఫలితాలను ప్రకటించడం మాదిగలకే కాదు, ఇతర ఎస్సీ ఉపవర్గాలకు కూడా నష్టం కలిగించే అంశం" అని స్పష్టం చేశారు. వర్గీకరణ పూర్తయ్యే వరకు అన్ని పోటీ పరీక్షల ఫలితాలను నిలిపివేయాలని ప్రభుత్వాన్ని డిమాండ్ చేశారు.

ఈ కార్యక్రమంలో సలిగంటి బాబన్న మాదిగ, మంద సంజీవరావు మాదిగ, అంకుష్ మాదిగ, యాకయ్య మాదిగ, కొంకటి కృష్ణ మాదిగ, అశోక్ కుమార్ మాదిగ, కనుకుంట్ల రాజు మాదిగ, రొట్ట రమేష్ మాదిగ, నరసాపురం వెంకట్ మాదిగ, జీడి రామచంద్ర మాదిగ, వెంకట్ రాజు, పవన్, మోషే, శివ, నవీన్, సంతు, యాకుబ్, నిరంజన్, బాలకృష్ణ, రమేష్, లాల్, కళ్యాణ్ తదితరులు పాల్గొన్నారు.