యువకుడిని కరిచి ఐదు నిమిషాల్లోనే చనిపోయిన విషపూరిత పాము

బాలాఘాట్ (మధ్యప్రదేశ్‌): పాముకాటు అంటే చచ్చే ప్రమాదం వ్యక్తికి ఉంటుందే కానీ... ఇక్కడ మాత్రం పామే చచ్చిపోయింది! ఇది చిల్లర కథ కాదు... బాలాఘాట్‌ జిల్లాలోని ఖుద్సోడి గ్రామంలో నిజంగా జరిగిన వాస్తవ సంఘటన ఇది. పాము కరిచిన యువకుడు ఆడతాడో లేదో అనుకుంటుండగా, ఐదు నిమిషాల్లో పామే చనిపోయింది. అందరూ ఆశ్చర్యపోయే ఈ సంఘటన స్థానికంగా సంచలనం సృష్టించింది.

ఏం జరిగింది?

ఖుద్సోడి గ్రామానికి చెందిన సచిన్ నాగ్‌పురే (వయస్సు 25) అనే యువకుడు ఓ కారు మెకానిక్‌. పనుల మధ్యలో వ్యవసాయ పనులు కూడా చూస్తుంటాడు. గురువారం ఉదయం సచిన్ తన పొలంలో పనులు చేస్తుండగా, ప్రమాదవశాత్తూ ఓ పాముపై కాలు వేసాడు. పాము భయంతో అతన్ని కరిచింది. అయితే కాటుకు గురైన సచిన్‌కు ఏమాత్రం అస్వస్థత రాకపోగా... నిమిషాల్లోనే పాము చనిపోవడం ఆయనను కూడా షాక్‌కు గురిచేసింది.

పామే చనిపోవడం ఎలా?

సచిన్ వెంటనే తన కుటుంబ సభ్యులకు సమాచారం ఇచ్చాడు. వారు వచ్చి సంఘటనా స్థలాన్ని పరిశీలించారు. అనంతరం చనిపోయిన పాముతో పాటు సచిన్‌ను సమీపంలోని ఆసుపత్రికి తీసుకెళ్లారు. వైద్యులు అక్కడ పాము జాతిని పరీక్షించి, ఇది అత్యంత విషపూరితమైన ‘డోంగర్బెలియా’ జాతి పాము అని తేల్చారు. ఈ జాతి పాములు సాధారణంగా కరిస్తే మానవుడు 30 నిమిషాల్లో మృతిచెందే అవకాశముంటుందని తెలిపారు. కానీ ఇక్కడ సంఘటన తలకిందులైంది – పామే చనిపోయింది!

రక్తం విషమైందా..?

సచిన్ ఈ ఘటనపై మాట్లాడుతూ, గత కొన్నేళ్లుగా తన పళ్ళు తువర్‌, వేప, అజాన్‌, కానుగ, నేరేడు, మామిడి, పల్సా, పిసుండి, చిడ్చిడియా వంటి చెట్ల ఆకులతో తుడుస్తున్నానని చెప్పారు. ఈ ఆకులన్నీ ఔషధ గుణాలు కలిగినవని, వాటి వల్ల తన రక్తంలో ఓ ప్రత్యేక గుణం ఏర్పడి ఉండవచ్చని, అదే పాముకి విషంగా మారి మరణానికి కారణమై ఉండవచ్చని భావిస్తున్నారు.

అధికారుల వివరణ

ఈ ఘటనపై స్థానిక అటవీ శాఖ అధికారి ధర్మేంద్ర బిసెన్ మాట్లాడుతూ, పాముకాటు అనంతరం పాముల దేహంలో శక్తివంతమైన నరాల స్పందనలు జరిగితే, దాని విషపు సంచి ఒక్కసారిగా పగిలిపోతుందన్నారు. అలాంటి సమయంలో పామే విషం వల్ల చనిపోయే అవకాశముందన్నారు. అయినా, ఇది చాలా అరుదైన సంఘటనగా ఆయన పేర్కొన్నారు.

సాధారణమైన సంఘటన కాదు.. విజ్ఞానం, ప్రకృతి మిళితం?

ఈ సంఘటన స్థానిక ప్రజల్లోనే కాదు, వైద్యవేత్తలు, పాముల శాస్త్రజ్ఞుల మధ్యా చర్చనీయాంశమైంది. విషపూరిత పాము కరిచి, కరిచిన వ్యక్తి బతికి పాము చనిపోవడమన్నది సహజసిద్ధ ప్రకృతి శక్తి వింతగా పనిచేసిన అంశం కావొచ్చని అంటున్నారు. సచిన్ జీవనశైలి, ఔషధ మొక్కల వినియోగం వలన ఇది జరిగి ఉండవచ్చని ఊహాగానాలు ఊపందుకున్నాయి.

ఈ సంఘటన మనకు ప్రకృతి, జాతుల మధ్య అసాధారణ సంఘటనలు ఎప్పుడు ఎలా జరిగే అవకాశం ఉందో గుర్తు చేస్తోంది. పాముకాటు ప్రమాదం నుంచి తప్పించుకున్న సచిన్ నిజంగా అదృష్టవంతుడే. అయితే, పాము చనిపోయేలా చేసిన కారణాలపై మరింత పరిశోధన అవసరమని నిపుణులు అభిప్రాయపడుతున్నారు.