పాలేరు రిజర్వాయర్‌కి నీటి విడుదల – కాంగ్రెస్ ప్రభుత్వ సంకల్పానికి నిలువెత్తు సాక్ష్యం

ఖమ్మం, పాలేరు రిజర్వాయర్ ఎడమకాల్వ టన్నెల్ పనులు యుద్ధప్రాతిపదికన పూర్తి చేయడం, తదనంతరం నీటిని విడుదల చేయడం రాష్ట్ర ప్రభుత్వం చేసిన ప్రాధాన్య కార్యక్రమాల్లో ఒకటిగా నిలిచింది. మంత్రి పొంగులేటి శ్రీనివాసరెడ్డి తో కలిసి నీటి విడుదల ఘట్టంలో పాల్గొన్న ఉప ముఖ్యమంత్రి మల్లు భట్టి విక్రమార్క మాట్లాడుతూ – “ఇది మా హామీలకు నిలువెత్తు నిదర్శనం” అని హర్షం వ్యక్తం చేశారు.

ఈ టన్నెల్ ద్వారా నాగార్జునసాగర్ ఎడమ ప్రధాన కాలువ నుంచి నీరు పాలేరు రిజర్వాయర్‌కు చేరుతుంది. అక్కడి నుంచి మొత్తం 2,55,344 ఎకరాల సాగుభూములకు ఈ నీరు అందనుంది. ఇది రైతుల జీవితాల్లో వెలుగు నింపే మరో కీలక అడుగుగా ప్రభుత్వం భావిస్తోంది.

"కృష్ణా నదిపై బహుళార్థక ప్రాజెక్టులు నిర్మించి పూర్తి చేసిన ఘనత కాంగ్రెస్ పార్టీదే. ఇప్పుడు వాటిని సమర్థవంతంగా అమలు చేసి, నీటిని నేరుగా రైతు పొలాలకు చేరుస్తున్నాం" అని డిప్యూటీ సీఎం పేర్కొన్నారు.

టీఆర్ఎస్ హయాంలో నీటి విషయంలో చేసిన తప్పులను సరిచేస్తూ, శాశ్వత పరిష్కారాల దిశగా గట్టి అడుగులు వేస్తున్నామని తెలిపారు.

"ఇది రైతు కలను నిజం చేసే ప్రభుత్వం. ఇది మట్టి మాణిక్యాల భవిష్యత్తును పరిరక్షించే బాధ్యత గల ప్రభుత్వం" అని వ్యాఖ్యానించారు.

వ్యవసాయంతో పాటు పశుపోషణ, మత్స్యకార శాఖల వంటి అనుబంధ రంగాలను ప్రోత్సహిస్తూ తెలంగాణను "అన్నపూర్ణ"గా, "విత్తన భాండాగారంగా" తీర్చిదిద్దడమే లక్ష్యమని చెప్పారు.

"రైతు మళ్లీ మట్టి మీద ఆశగా నిలవాలి. ఆయకట్టులో నీరు మరల జీవనాడిగా ప్రవహించాలి. అదే మా సంకల్పం" అంటూ డిప్యూటీ సీఎం తన ఉద్దేశాన్ని స్పష్టం చేశారు.