ఆసియాలోనే అతిపెద్ద గిరిజన జాతర – మేడారం మహా జాతర తేదీలు ఖరారు

ములుగు జిల్లా తాడ్వాయి మండలం మేడారంలో ప్రతి రెండేళ్లకోసారి జరిగే ప్రముఖ గిరిజన మహోత్సవం మేడారం సమ్మక్క-సారలమ్మ మహా జాతర వచ్చే ఏడాది జనవరిలో జరగనుంది. పూజారుల సంఘం తాజాగా ప్రకటించిన వివరాల ప్రకారం, 2026 జనవరి 28 నుంచి 31 వరకు జాతర జరుగుతుంది.

పూజారుల ప్రకటన ప్రకారం:

🔹 జనవరి 28న – సారలమ్మ, గోవిందరాజు, పగిడిద్దరాజు గద్దెలపై ప్రతిష్టింపబడతారు.

🔹 జనవరి 29న – సమ్మక్క తల్లి చిలకలగుట్ట నుంచి గద్దెలకు చేరుకుంటారు.

🔹 జనవరి 30న – భక్తులు తాము కోరికల కోసం మొక్కిన మొక్కులను చెల్లించుకుంటారు.

🔹 జనవరి 31న – అమ్మవార్లు వనప్రవేశానికి బయలుదేరుతారు.

ఈ జాతరలో తెలంగాణతోపాటు పొరుగు రాష్ట్రాలైన ఆంధ్రప్రదేశ్‌, మహారాష్ట్ర, ఛత్తీస్‌గఢ్‌, ఒడిషా తదితర ప్రాంతాల నుంచి లక్షలాదిమంది భక్తులు తరలివచ్చి అమ్మవార్లను దర్శించుకుంటారు. గిరిజన సంప్రదాయాలను, విశ్వాసాలను ప్రతిబింబించే ఈ జాతరకు ప్రభుత్వ స్థాయిలో పెద్ద ఎత్తున ఏర్పాట్లు చేయడం పరిపాటి.

ఈ సందర్భంగా ములుగు జిల్లా అధికారులు, పూజారులు, స్థానిక గిరిజన పెద్దలు కలిసి భద్రత, రవాణా, వైద్య సేవలు, తాగునీరు, శుచిత్వం వంటి అంశాలపై ముందస్తు ఏర్పాట్లకు శ్రీకారం చుట్టనున్నారు.