చెన్నూర్‌ ఎస్బీఐలో భారీ మోసం బహిర్గతం

చెన్నూర్‌ ఎస్బీఐలో భారీ మోసం బహిర్గతం – 44 మంది అరెస్టు

రామగుండం కమిషనరేట్‌: చెన్నూర్‌ ఎస్బీఐ బ్రాంచ్‌లో జరిగిన భారీ స్థాయి గోల్డ్ లోన్ మోసం కేసును రామగుండం పోలీస్ కమిషనరేట్ అధికారులు ఛేదించారు. ఈ ఘటనలో మొత్తం 44 మంది నిందితులను అదుపులోకి తీసుకున్నారు. వీరిలో ముగ్గురు ఎస్బీఐ ఉద్యోగులు కూడా ఉన్నారు. ఇప్పటివరకు 15.23 కిలోల బంగారు ఆభరణాలు మరియు రూ.1.61 లక్షల నగదు పోలీసులు స్వాధీనం చేసుకున్నారు.

కేసు నేపథ్యం

2025 ఆగస్టు 23న ఉదయం 10 గంటలకు ఎస్బీఐ రీజినల్ మేనేజర్ రితేష్ కుమార్ గుప్తా, చెన్నూర్ పోలీస్ స్టేషన్‌లో ఫిర్యాదు చేశారు. ఫిర్యాదు ప్రకారం, బ్యాంకులోని 402 గోల్డ్ లోన్ ఖాతాలకు చెందిన 25.17 కిలోల బంగారం (సుమారు రూ.12.61 కోట్లు విలువ) మరియు రూ.1.10 కోట్లు నగదు మాయమైందని తెలిపారు.

ఫిర్యాదు స్వీకరించిన వెంటనే రామగుండం కమిషనర్ ఆఫ్ పోలీస్ ఏ.భాస్కర్, ఐపీఎస్ మార్గదర్శకత్వంలో, డీసీపీ మంచిర్యాల్ పర్యవేక్షణలో నాలుగు ప్రత్యేక బృందాలు ఏర్పాటయ్యాయి. దర్యాప్తు బాధ్యత ఏసీపీ జైపూర్ ఏ. వెంకటేశ్వర్ కి అప్పగించారు.

మోసం ఎలా జరిగింది?

దర్యాప్తులో ప్రధాన నిందితుడు నరిగె రవీందర్ (క్యాషియర్) తనపై ఉన్న ఆన్‌లైన్ క్రికెట్ బెట్టింగ్ అప్పులను తీర్చుకోవడం కోసం ఈ మోసానికి పాల్పడ్డాడని బయటపడింది. అతను బ్యాంక్ మేనేజర్ వెన్నపురెడ్డి మనోహర్ మరియు ఔట్‌సోర్సింగ్ ఉద్యోగి లక్కాకుల సందీప్ తో కుమ్మక్కై, గోల్డ్ లోన్ చెస్ట్‌లోని బంగారం, నగదును క్రమంగా అపహరించాడు.

ఈ బంగారాన్ని స్నేహితుల ద్వారా SBFC, Indel Money, Muthoot Finance, Manappuram వంటి ప్రైవేట్ గోల్డ్ ఫైనాన్స్ కంపెనీలలో తాకట్టు పెట్టి డబ్బు తెచ్చుకున్నారు. ఇప్పటివరకు 10 ప్రైవేట్ కంపెనీలలో 142 గోల్డ్ లోన్లు తీసుకున్నట్లు పోలీసులు తెలిపారు. అదేవిధంగా రవీందర్ తన భార్య, బంధువుల పేర్లపై 42 తప్పుడు గోల్డ్ లోన్లు సృష్టించి, బంగారం లేకుండానే రూ.1.58 కోట్లు విత్‌డ్రా చేశాడు.

నిందితులు, రికవరీ

ఈ మోసంలో ప్రధానంగా 3 మంది ఎస్బీఐ ఉద్యోగులు, ప్రైవేట్ ఫైనాన్స్ కంపెనీల సిబ్బంది, బంధువులు, స్నేహితులు కలిపి 44 మందిని పోలీసులు అరెస్టు చేశారు.

రికవరీ అయిన బంగారం – 15.237 కిలోలు
రికవరీ అయిన నగదు – రూ.1,61,730
ఇంకా మిగిలిన బంగారం మణప్పురం, ముత్తూట్ వంటి కంపెనీల నుండి రాబట్టే ప్రక్రియ కొనసాగుతోంది.

అభినందనలు

ఈ కేసును తక్కువ కాలంలోనే విజయవంతంగా ఛేదించినందుకు రామగుండం కమిషనర్ ఆఫ్ పోలీస్ ఏ. భాస్కర్, ఐపీఎస్ ప్రత్యేక బృందంలోని అధికారులు, సిబ్బందిని అభినందించారు.