ఎమ్మెల్సీ పదవికి, బీఆర్ఎస్ పార్టీకి రాజీనామా చేసిన కల్వకుంట్ల కవిత

హైదరాబాద్‌: బీఆర్ఎస్ ఎమ్మెల్సీ కల్వకుంట్ల కవిత పెద్ద రాజకీయ నిర్ణయం తీసుకున్నారు. ఎమ్మెల్సీ పదవికి, బీఆర్ఎస్ పార్టీ ప్రాథమిక సభ్యత్వానికి రాజీనామా చేస్తున్నట్లు ఆమె బహిరంగంగా ప్రకటించారు. ఇటీవల పార్టీ తనపై సస్పెన్షన్ వేటు వేయడం, తమను బహిష్కరించడం పట్ల కవిత ఆవేదన వ్యక్తం చేశారు.

ప్రెస్‌మీట్ నిర్వహించిన కవిత “జై తెలంగాణ” అంటూ ప్రారంభించి, బీఆర్ఎస్ నేతలపై తీవ్రమైన విమర్శలు గుప్పించారు. బీఆర్ఎస్ విడుదల చేసిన తన సస్పెన్షన్ ప్రకటనను మరోసారి చదివి వినిపిస్తూ, పార్టీ తనను అవమానించిందని వ్యాఖ్యానించారు.

“నేను పోరాడింది తెలంగాణ కోసం.. కానీ నన్ను త్యజించింది బీఆర్ఎస్ నాయకత్వం” అంటూ భావోద్వేగంగా మాట్లాడిన కవిత, ఇకపై తన రాజకీయ ప్రయాణం కొత్త దిశలో కొనసాగుతుందని సంకేతాలు ఇచ్చారు.

🔴 కవిత రాజీనామా తెలంగాణ రాజకీయాల్లో కొత్త చర్చలకు, కొత్త సమీకరణాలకు దారితీయనుంది.