విద్యార్థులతో ఉపాధ్యాయులు వెట్టి చాకిరీ చేయించిన ఘటన

 

వైరాలో పాఠశాలలో వెట్టి చాకిరీ కలకలం

ఖమ్మం జిల్లా వైరా పట్టణంలోని బ్రాహ్మణపల్లి ప్రాథమిక పాఠశాలలో విద్యార్థులతో ఉపాధ్యాయులు వెట్టి చాకిరీ చేయించిన ఘటన పెద్ద వివాదానికి దారితీసింది.

స్కావెంజర్ అనారోగ్యంతో రెండు రోజులుగా రాకపోవడంతో ఉపాధ్యాయుడు నరసింహారావు, సహ ఉపాధ్యాయురాలు సత్యవతి విద్యార్థుల చేతనే పాఠశాల గదులు, ఆవరణ శుభ్రం చేయించారు. ఈ విషయం బయటపడగానే పాత్రికేయులపై ఆగ్రహం వ్యక్తం చేసిన నరసింహారావు, “పిల్లలతో శుభ్రం చేయిస్తే తప్పేంటి.. ఫొటోలు తీయడానికి మీరెవరు?” అంటూ వాగ్వాదానికి దిగాడు.

ఈ ఘటనపై సమాచారం అందుకున్న ఎంఈఓ కొత్తపల్లి వెంకటేశ్వర్లు పాఠశాలను పరిశీలించారు. అయితే అక్కడ కూడా ఉపాధ్యాయుడు దురుసుగా ప్రవర్తించినట్లు తెలిసింది. “స్కావెంజర్ జ్వరంతో రాకపోవడంతో విద్యార్థులతో శుభ్రం చేయించాం” అని ఆయన అంగీకరించారు.

📌 తల్లిదండ్రులు విద్యార్థులతో వెట్టి చాకిరి చేయించిన ఉపాధ్యాయులపై జిల్లా విద్యాశాఖ అధికారులు తక్షణ చర్యలు తీసుకోవాలని డిమాండ్ చేస్తున్నారు.