డెంటల్ డాక్టర్‌ను టార్గెట్ చేసిన సైబర్‌ దొంగలు – రూ.14 కోట్ల భారీ మోసం
హైదరాబాద్‌: హబ్సిగూడ : హైదరాబాద్‌లో మరో భారీ సైబర్‌ మోసం వెలుగుచూసింది. హబ్సిగూడకు చెందిన ఒక డెంటల్ డాక్టర్‌ను లక్ష్యంగా చేసుకున్న సైబర్‌ నేరగాళ్లు ఆశ్చర్యపరిచే స్థాయిలో రూ.14 కోట్లు దోచుకెళ్లిన ఘటన వెలుగులోకి వచ్చింది. ఫేస్‌బుక్‌లో ‘మౌనిక’ పేరుతో సృష్టించిన ఫేక్‌ ఐడీ ద్వారా ఈ మోసం మొదలైంది.
ఫేస్‌బుక్‌లో పరిచయం… మెసెంజర్‌లో వల
ఫేస్‌బుక్‌లో మౌనిక పేరుతో వచ్చిన ఫ్రెండ్ రిక్వెస్ట్‌కు స్పందించిన డెంటల్ డాక్టర్‌కు మెసెంజర్‌లో చాట్ ఆరంభమైంది. తనను తాను కష్టాల్లో ఉన్నానని చెబుతూ డాక్టర్‌ను భావోద్వేగాలకు గురి చేసింది. సానుభూతితో సహాయం చేయాలనుకున్న డాక్టర్‌ ఆమె నాటకానికి బలి అయ్యారు.
క్రిప్టో ట్రేడింగ్ పేరిట భారీ మోసం
నమ్మకం పెరిగిన తరువాత ‘క్రిప్టో కరెన్సీ ట్రేడింగ్‌లో మంచి లాభాలు వస్తాయి’ అంటూ మౌనిక పేరిట ఉన్న నేరగాడు డాక్టర్‌తో ప్రత్యేక ట్రేడింగ్ అకౌంట్ ఓపెన్ చేయించాడు. ప్రారంభంలో చిన్నగా లాభాలు వచ్చినట్టు స్క్రీన్‌షాట్లు చూపిస్తూ డాక్టర్‌ను నమ్మించాడు.
లాభాలు చూపించి... చివరికి ఉచ్చు
ఖాతాలో కోట్ల రూపాయల లాభాలు చేరినట్టు చూపించి, వాటిని విత్‌డ్రా చేసుకోవాలంటే “ట్యాక్స్‌ చెల్లించాలి” అంటూ మరో మోసం మొదలెట్టారు. నమ్మిన డాక్టర్‌ ట్యాక్స్‌ పేరిట భారీ మొత్తాలు బదిలీ చేస్తూ ఉండగా… చివరకు మొత్తం రూ.14 కోట్లు సైబర్‌ నేరగాళ్ల చేతికి వెళ్లిపోయాయి.
డాక్టర్‌కు షాక్, పోలీసులకు ఫిర్యాదు
తాను మోసపోయానన్న విషయం గ్రహించిన వెంటనే డాక్టర్‌ సైబర్‌ క్రైమ్‌ పోలీసులను ఆశ్రయించారు. కేసు నమోదు చేసిన పోలీసులు నేరగాళ్ల కోసం వేట మొదలుపెట్టారు.
Post a Comment