గంజాయి కేసులో ఇద్దరికీ 10 సంవత్సరాల జైలు శిక్ష లక్ష రూపాయల జరిమానా

కొత్తగూడెం లీగల్ :: గంజాయి రవాణా కేసులో అరెస్టయిన ఇద్దరు నిందితులకు కొత్తగూడెం మొదటి అదనపు జిల్లా న్యాయమూర్తి — ఎన్‌డిపిఎస్ స్పెషల్ జడ్జ్ ఎస్. సరిత — పది సంవత్సరాల జైలు శిక్ష, చొప్పున ఒక లక్ష రూపాయల జరిమానా విధిస్తూ మంగళవారం కీలక తీర్పు వెల్లడించారు.

కేసు వివరాలు

2020 సెప్టెంబర్ 15న భద్రాచలం టౌన్‌కు చెందిన అప్పటి సబ్‌ఇన్‌స్పెక్టర్ బి. మహేష్, ఫారెస్ట్ చెక్‌పోస్ట్ వద్ద నిత్య తనిఖీలు నిర్వహిస్తున్న సమయంలో, టాటా కంపెనీకి చెందిన మినీ గూడ్స్ వ్యాన్ అతివేగంగా రావడం గమనించారు. వాహనాన్ని ఆపి తనిఖీ చేసినప్పుడు పెద్ద మొత్తంలో గంజాయి కనుగొన్నారు.

సీజ్ చేసిన గంజాయి

10 ప్లాస్టిక్ ప్యాకెట్లు
మొత్తం బరువు: 226.500 కిలోలు
విలువ: ₹33,97,250

వీటిని రవాణా చేస్తున్న ఒడిశా రాష్ట్రం మల్కానగిరి జిల్లాకు చెందిన

సుజిత్ గోల్డ్డర్
మనోజిత్ రాయ్
అనే ఇద్దరిని SI మహేష్ అదుపులోకి తీసుకుని కేసు నమోదు చేశారు.

అనంతరం అప్పటి ఇన్‌స్పెక్టర్ టి. స్వామి దర్యాప్తు జరిపి కోర్టులో చార్జ్‌షీట్ దాఖలు చేశారు.

కోర్టు విచారణ

కోర్టులో మొత్తం ముగ్గురు సాక్షులను పరీక్షించారు. నిందితులపై ఆరోపణలు నిర్ధారితమవడంతో జడ్జి పది సంవత్సరాల జైలు శిక్షతో పాటు ఒక్కొక్కరికి ఒక లక్ష రూపాయల జరిమానా విధించారు. జరిమానా చెల్లించని పక్షంలో అదనంగా ఆరు నెలల సాధారణ కారాగార శిక్ష విధించనున్నట్లు కోర్టు పేర్కొంది.