ట్రాఫిక్ చలాన్ల అమలుపై హైకోర్టు సీరియస్‌“ఆ హక్కు మీకు లేదు” – హోం శాఖకు నోటీసులు

హైదరాబాద్‌: తెలంగాణలో ట్రాఫిక్ ఈ-చలాన్ల విధానంపై హైకోర్టు తీవ్ర ఆక్షేపణలు వ్యక్తం చేసింది. పారదర్శకత లేకుండా చలాన్లు జారీ చేస్తున్నారంటూ వి. రాఘవేంద్ర చారి దాఖలు చేసిన రిట్ పిటిషన్‌ను విచారించిన జస్టిస్ మాధవి దేవి, ఈ అంశంపై రాష్ట్ర హోంశాఖ పూర్తివివరణ సమర్పించాలని ఆదేశించారు. నాలుగు వారాల్లోగా కౌంటర్ అఫిడవిట్ దాఖలు చేయాల్సిందిగా నోటీసులు జారీ చేశారు.

వ్యక్తిగత ఫోన్లతో ఫొటోలు తీసి చలాన్లు?

పిటిషనర్ రాఘవేంద్ర చారి, ట్రాఫిక్ పోలీసులు అధికారికంగా నిర్ధారించని పరికరాలతో—అంటే స్వంత మొబైల్ ఫోన్లతో—వాహనాల ఫోటోలు తీసి చలాన్లు జారీ చేస్తున్నారని ఆరోపించారు.

తనపై కూడా ఇటువంటి మూడు చలాన్లు విధించారని కోర్టుకు వివరించారు.

ధృవీకరించని పరికరాలతో తీసిన ఫోటోలు చట్టపరంగా సాక్ష్యంగా పరిగణించరాదని, ప్రభుత్వం ఆమోదించిన నిఘా కెమెరాల ద్వారానే ఉల్లంఘనలను రికార్డు చేయాలని పిటిషనర్ వాదించారు.

“నియమాలు ఉల్లంఘించి జరిమానాలు విధించడం హక్కులపై దాడి” – హైకోర్టు

చట్టవిరుద్ధంగా చలాన్లు జారీ చేయడం వాహనదారుల హక్కులను హరించడమేనని హైకోర్టు వ్యాఖ్యానించింది. సిబ్బంది స్వతహాగా జరిమానా మొత్తాలను నిర్ణయించడం, న్యాయపర్యవేక్షణ లేకుండా డబ్బు వసూలు చేయడం సరికాదని పిటిషన్‌లో అభ్యంతరాలను కోర్టు పరిగణనలోకి తీసుకుంది.

పిటిషనర్ అభిప్రాయం ప్రకారం,

• శిక్ష విధించే అధికారం జ్యుడీషియల్ మేజిస్ట్రేట్‌కే ఉంటుంది
• కానిస్టేబుళ్లు, ఇన్‌స్పెక్టర్లు జరిమానాలు విధించడం చట్టవిరుద్ధం అని స్పష్టం చేశారు.

జీవో 108 కూడా సవాల్‌

2011లో జారీ చేసిన జీవో నెం.108ను కూడా ఈ రిట్ సవాలు చేస్తోంది. ఈ జీవో పోలీసులకు వాహనాలను ఆపి, అక్కడికక్కడే కాంపౌండ్ ఫైన్లు వసూలు చేసే అధికారం ఇస్తోంది. అయితే ఇది రాజ్యాంగ విరుద్ధమని, ప్రజా హక్కుల ఉల్లంఘన అని పిటిషనర్ వాదించారు.

పిటిషనర్ తరఫున న్యాయవాది విజయ్ గోపాల్ మాట్లాడుతూ, “పోలీసులు దశాబ్దాలుగా చట్టపరమైన హద్దులు దాటి డబ్బు వసూలు చేస్తున్నారు” అని కోర్టు దృష్టికి తీసుకువచ్చారు.

హోమ్ శాఖ తరఫున ఏజీపీ లక్ష్మీకాంత్ హాజరయ్యారు.

“రాయితీలు ప్రజల్లో భయం తగ్గిస్తున్నాయి” – హైకోర్టు మరో కీలక వ్యాఖ్య

ఇదిలా ఉండగా, ఇటీవల జరిగిన మరో విచారణలో, ట్రాఫిక్ చలాన్లపై ప్రభుత్వం తరచుగా ప్రకటించే రాయితీలను హైకోర్టు తీవ్రమైన పదజాలంతో విమర్శించింది. ఇలాంటి రాయితీలు చట్టపరమైన భయాన్ని తగ్గించి, ట్రాఫిక్ క్రమశిక్షణను దెబ్బతీస్తున్నాయని కోర్టు స్పష్టం చేసింది.