ఒంటరితనంతో మానసిక వేదన పెళ్లైన నాలుగు నెలల్లోనే భార్య ఆత్మహత్య

హైదరాబాద్‌ ముసాపేటలో విషాద ఘటన

హైదరాబాద్‌, డిసెంబర్‌ 18: ముసాపేట ప్రాంతంలో జరిగిన విషాద ఘటన స్థానికంగా తీవ్ర కలకలం రేపింది. దాంపత్య జీవితంలో ఏర్పడిన విభేదాలు, ఒంటరితనం కారణంగా పెళ్లైన నాలుగు నెలల్లోనే ఓ యువతి బలవన్మరణానికి పాల్పడింది.

కొత్తగూడెం ప్రాంతానికి చెందిన బీ. వెంకటసాయి, కడప జిల్లా పొద్దుటూరుకు చెందిన చందనాజ్యోతి (25)కి నాలుగు నెలల క్రితం పెద్దల సమక్షంలో వివాహం జరిగింది. పెళ్లి అనంతరం ఇద్దరూ హైదరాబాద్‌లో నివసిస్తూ ఉద్యోగాలు చేస్తున్నారు. వెంకటసాయి మెడ్‌ప్లస్ సంస్థలో పనిచేస్తుండగా, చందనాజ్యోతి సాఫ్ట్‌వేర్ రంగంలో వర్క్‌ ఫ్రం హోమ్ చేస్తోంది.

భర్త ఉద్యోగ కారణాల వల్ల ఉదయం ఇంటి నుంచి వెళ్లి రాత్రివేళ ఆలస్యంగా తిరిగి రావడం వల్ల దంపతుల మధ్య విభేదాలు ఏర్పడినట్లు సమాచారం. భర్త నుంచి తగినంత సమయం, భావోద్వేగ అనుబంధం లభించడం లేదన్న భావనతో చందనాజ్యోతి మానసికంగా కలతకు గురైనట్లు ఆమె సన్నిహితులు తెలిపారు.

ఈ విషయమై గత కొన్ని రోజులుగా భార్యాభర్తల మధ్య మాటామాటా చోటుచేసుకున్నట్లు తెలుస్తోంది. నిన్న రాత్రి కూడా వాగ్వాదం అనంతరం ఇద్దరూ వేర్వేరు గదుల్లో నిద్రించినట్లు సమాచారం.

ఉదయం వరకు గదిలో నుంచి బయటకు రాని చందనాజ్యోతిని పలుమార్లు పిలిచినా స్పందన రాకపోవడంతో, వెంకటసాయి గది తలుపు పగలగొట్టి చూడగా ఆమె బెడ్‌షీట్‌తో ఉరివేసుకుని కనిపించింది. వెంటనే ఆసుపత్రికి తరలించినప్పటికీ అప్పటికే మృతి చెందినట్లు వైద్యులు ధృవీకరించారు.

సమాచారం అందుకున్న పోలీసులు సంఘటనా స్థలానికి చేరుకుని కేసు నమోదు చేసి దర్యాప్తు ప్రారంభించారు. కుటుంబ కలహాలు, మానసిక ఒత్తిడి, ఒంటరితనం కారణంగా యువ దాంపత్యం ఇలా ముగిసిపోవడం అందరినీ విషాదంలో ముంచెత్తింది.