ఉపాధి హామీ కూలీలకు కీలక అలర్ట్.. వేతన చెల్లింపుల్లో కొత్త నిబంధనలు

గ్రామీణ ప్రాంతాల ఉపాధి హామీ కూలీలకు కేంద్ర ప్రభుత్వం కీలక అలర్ట్ జారీ చేసింది. మహాత్మా గాంధీ జాతీయ గ్రామీణ ఉపాధి హామీ పథకం (MGNREGA) కింద వేతనాల చెల్లింపుల విధానంలో కొత్త నిబంధనలు అమలు చేయనున్నట్లు తెలుస్తోంది.

కొత్త మార్గదర్శకాల ప్రకారం ఇకపై ప్రైవేట్ బ్యాంకులు, గ్రామీణ బ్యాంకుల ఖాతాల్లో ఉపాధి హామీ వేతనాలు జమ కాకపోవచ్చని సమాచారం. వేతనాలు కేవలం జాతీయీకృత బ్యాంకులు మరియు పోస్టాఫీస్ ఖాతాల్లో మాత్రమే జమ చేసే అవకాశముందని అధికారులు సూచిస్తున్నారు.

ఈ నేపథ్యంలో ప్రస్తుతం గ్రామీణ బ్యాంకుల్లో ఖాతాలు కలిగిన ఉపాధి హామీ కూలీలు తప్పనిసరిగా జాతీయీకృత బ్యాంకు లేదా పోస్టాఫీస్‌లో కొత్త ఖాతాలు తెరవాల్సి ఉంటుందని అధికారులు చెబుతున్నారు. ఖాతా మార్పు చేయకపోతే వేతనాల చెల్లింపులో ఆలస్యం లేదా నిలిచిపోయే ప్రమాదం ఉందని హెచ్చరిస్తున్నారు.

అందుకే ఉపాధి హామీ కూలీలు తమ ఖాతా వివరాలను త్వరగా నవీకరించుకుని, సంబంధిత పంచాయతీ కార్యాలయం లేదా ఉపాధి హామీ సిబ్బందిని సంప్రదించాలని అధికారులు సూచిస్తున్నారు.