అంబర్పేట్ ఎస్సై భాను ప్రకాష్ రెడ్డి అరెస్ట్
హైదరాబాద్, జనవరి 10: సర్వీస్ రివాల్వర్ను తాకట్టు పెట్టిన ఘటనలో అంబర్పేట్ పోలీస్ స్టేషన్కు చెందిన ఎస్సై భాను ప్రకాష్ రెడ్డిని పోలీసులు అరెస్ట్ చేశారు. శుక్రవారం ఉదయం ఆయనను అదుపులోకి తీసుకున్న పోలీసులు, అనంతరం చంచల్గూడ జైలుకు రిమాండ్కు తరలించారు. ప్రస్తుతం భాను ప్రకాష్ రెడ్డి చంచల్గూడ జైలులో ఉన్నట్లు అధికారులు తెలిపారు.
బెట్టింగ్కు సంబంధించిన అప్పులు తీర్చేందుకు రికవరీకి సంబంధించిన ఆస్తులను కాజేసి, వాటిని తాకట్టు పెట్టిన వ్యవహారంలో భాను ప్రకాష్ రెడ్డి పాత్ర వెలుగులోకి రావడంతో ఈ అరెస్టు జరిగింది. ఈ కేసు విచారణలో భాగంగా మరిన్ని కీలక విషయాలు బయటపడుతున్నట్లు పోలీసులు పేర్కొన్నారు.
అంతేకాకుండా తన సర్వీస్ రివాల్వర్ ఎక్కడో పోయిందని భాను ప్రకాష్ రెడ్డి అధికారులకు వెల్లడించారు. ట్రైన్లో ప్రయాణిస్తున్న సమయంలో రివాల్వర్ గల్లంతైందని స్టేట్మెంట్ ఇచ్చిన ఆయన, ఎంత వెతికినా ఆయుధం లభించలేదని కన్ఫెస్ చేసినట్లు పోలీసులు తెలిపారు. అయితే సర్వీస్ రివాల్వర్ వంటి కీలక ఆయుధం గల్లంతు కావడం భద్రతాపరంగా తీవ్ర ఆందోళన కలిగించే అంశంగా మారింది. దీంతో ఈ కోణంలో కూడా విచారణను మరింత లోతుగా కొనసాగిస్తున్నారు.
ఇదిలా ఉండగా, భాను ప్రకాష్ రెడ్డి ఆంధ్రప్రదేశ్లో గ్రూప్–2 ఉద్యోగం కూడా పొందినట్లు సమాచారం. ఆ మేరకు అక్కడికి రిలీవ్ కావాలని ఇప్పటికే రిక్వెస్ట్ పెట్టుకున్నట్లు తెలిసింది. అయితే తాజా అరెస్టుతో ఆ ప్రక్రియపై అనిశ్చితి నెలకొంది.
భాను ప్రకాష్ రెడ్డిపై నమోదైన ఆరోపణలపై పూర్తి స్థాయి దర్యాప్తు కొనసాగుతుందని, అవసరమైతే మరిన్ని కేసులు నమోదు చేసే అవకాశం ఉందని పోలీసులు స్పష్టం చేశారు.
Post a Comment