మున్సిపల్ ఎన్నికల్లో ఖాతా తెరిచినా కాంగ్రెస్
తెలంగాణ మున్సిపల్ ఎన్నికల్లో కాంగ్రెస్ పార్టీ ఖాతా తెరిచింది. మెదక్, రామగుండం, పాలమూరు ప్రాంతాల్లో కాంగ్రెస్ అభ్యర్థులు ఏకగ్రీవంగా ఎన్నికయ్యే పరిస్థితి ఏర్పడింది.
మెదక్ మున్సిపాలిటీలో కాంగ్రెస్ బోణీ
మెదక్ మున్సిపాలిటీ 32వ వార్డు నుంచి కాంగ్రెస్ అభ్యర్థి గోదల మానస ఏకగ్రీవంగా ఎన్నికయ్యే అవకాశాలు ఉన్నాయి. ఈ వార్డులో కాంగ్రెస్ తరపున మానస, లక్ష్మి, బీఆర్ఎస్ నుంచి జ్యోతి నామినేషన్లు దాఖలు చేశారు. ఇటీవలే బీఆర్ఎస్లో చేరిన జ్యోతికి పార్టీ బీఫాం ఇచ్చినా, ఆమె నామినేషన్ను ఉపసంహరించుకుని కాంగ్రెస్ అభ్యర్థి మానసకు మద్దతు ప్రకటించారు. అలాగే మానస అత్త (భర్త తల్లి) లక్ష్మి కూడా నామినేషన్ను ఉపసంహరించుకున్నారు. దీంతో మానస ఒక్కరే బరిలో మిగలడంతో ఆమె ఏకగ్రీవంగా ఎన్నిక కానున్నారు.
రామగుండం కార్పొరేషన్లో కాంగ్రెస్ విజయం
పెద్దపల్లి జిల్లా రామగుండం నగరపాలక సంస్థ ఎన్నికల్లో కాంగ్రెస్ ఖాతా తెరిచింది. ఒకటో డివిజన్లో కాంగ్రెస్ అభ్యర్థి మడిపల్లి విజయ ఏకగ్రీవంగా ఎన్నికయ్యే అవకాశం ఉంది.
ఈ డివిజన్లో కాంగ్రెస్ నుంచి మడిపల్లి విజయ, బీఆర్ఎస్ నుంచి విజ్జగిరి శ్వేత, బీజేపీ నుంచి రీమా బిశ్వాస్ నామినేషన్లు వేశారు. అయితే బీఆర్ఎస్, బీజేపీ అభ్యర్థులు నామినేషన్లు ఉపసంహరించుకున్నారు.
నామినేషన్ ఉపసంహరణపై బీజేపీ అభ్యర్థి రీమా బిశ్వాస్ తీవ్ర ఆరోపణలు చేశారు. తన భర్త పంకజ్కుమార్ను ఎన్టీపీసీ ప్లాంట్లో విధుల్లో ఉండగా పోలీసులు పిలిపించి గంజాయి కేసు పెడతామని బెదిరించారని ఆమె ఆరోపించారు. ఈ విషయమై అదనపు డీసీపీ శ్రీనివాస్కు ఫిర్యాదు చేసి కాంగ్రెస్ నాయకులపై చర్యలు తీసుకోవాలని కోరారు.
పాలమూరు కార్పొరేషన్లో కాంగ్రెస్ బోణీ
పాలమూరు కార్పొరేషన్లో కూడా కాంగ్రెస్ బోణీ కొట్టింది. 58వ డివిజన్ (రాజేంద్రనగర్) నుంచి కాంగ్రెస్ అభ్యర్థి రమాదేవి నామినేషన్ వేశారు. బరిలో ఉన్న బీజేపీ అభ్యర్థి నామినేషన్ను ఉపసంహరించుకోవడంతో ఎన్నిక ఏకగ్రీవంగా మారింది.
Post a Comment