లంచం తీసుకుంటూ ఎస్సై అరెస్ట్ – ఏసీబీ ట్రాప్‌లో చిక్కిన ఖాకీ

నాగర్‌కర్నూల్, మార్చి 30: నాగర్‌కర్నూల్ జిల్లాలో అవినీతి ఘటన సంచలనంగా మారింది. వాహనాల విడుదల కోసం లంచం డిమాండ్ చేసిన ఓ పోలీసు ఎస్సైను Anti-Corruption Bureau (ఏసీబీ) అధికారులు రెడ్ హ్యాండెడ్‌గా పట్టుకున్నారు.

ఏసీబీ ఎస్పీ బాలకృష్ణ తెలిపిన వివరాల ప్రకారం, తిమ్మాజిపేట మండలంలో ఇసుక తరలిస్తున్న ఓ వ్యక్తికి చెందిన ట్రాక్టర్, జేసీబీ వాహనాలను పోలీసులు స్వాధీనం చేసుకున్నారు. ఈ ఘటనపై ఎస్సై హరి ప్రసాద్ రెడ్డి కేసు నమోదు చేసి, మైనింగ్ అధికారులకు సమాచారం అందించారు. విచారణ అనంతరం మైనింగ్ శాఖ అధికారులు ఆ వాహనాలకు రూ.60 వేల జరిమానా విధించారు.

జరిమానా చెల్లించిన బాధితుడు వాహనాల విడుదల కోసం అవసరమైన పత్రాలు సమర్పించినప్పటికీ, ఎస్సై అదనంగా రూ.30 వేల లంచం ఇవ్వాలని డిమాండ్ చేసినట్లు సమాచారం. ఇప్పటికే కొంత మొత్తం ఇచ్చిన బాధితుడిని, మిగతా డబ్బు ఇవ్వాలని ఒత్తిడి చేయడంతో అతను ఏసీబీ అధికారులను ఆశ్రయించాడు.

ఎస్సైతో జరిగిన సంభాషణలను రికార్డ్ చేసి ఆధారాలతో ఫిర్యాదు చేసిన బాధితుడి సహకారంతో ఏసీబీ అధికారులు ట్రాప్ నిర్వహించారు. సోమవారం పోలీస్ స్టేషన్‌లో బాధితుడి నుంచి రూ.20 వేల లంచం తీసుకుంటుండగా ఎస్సైను రెడ్ హ్యాండెడ్‌గా పట్టుకున్నారు.

ఈ ఘటనపై కేసు నమోదు చేసి, నిందిత ఎస్సైను అదుపులోకి తీసుకుని దర్యాప్తు కొనసాగిస్తున్నట్లు అధికారులు వెల్లడించారు.

ప్రధానాంశాలు: