బ్యాంక్ మేనేజరే నిందితుడు.. రూ.137 కోట్ల భారీ సైబర్ కుంభకోణం!

బ్యాంక్ మేనేజరే నిందితుడు.. కరీంనగర్‌లో రూ.137 కోట్ల భారీ సైబర్ కుంభకోణం!

కరీంనగర్, మార్చి 28: కరీంనగర్ నగరంలో భారీ సైబర్ మోసం బయటపడింది. మొత్తం రూ.137 కోట్లకు పైగా జరిగిన ఈ కుంభకోణాన్ని పోలీసులు ఛేదించారు. కమిషనరేట్ పోలీసులు చేపట్టిన **“ఆపరేషన్ క్రాక్‌డౌన్ 1.0”**లో భాగంగా సైబర్ నేరాలకు సహకరించే మ్యూల్ బ్యాంకు ఖాతాల నెట్వర్క్‌ను బయటపెట్టారు.

24 మందిని గుర్తింపు.. 13 మంది అరెస్ట్

ఈ కేసులో మొత్తం 24 మందిని పోలీసులు గుర్తించారు. వీరిలో 13 మందిని అరెస్ట్ చేసినట్లు అధికారులు తెలిపారు. ప్రధాన నిర్వాహకుడు బండారి సాయిరాం అనే వ్యక్తి ఈ నెట్వర్క్‌ను కొంతమంది సహచరులతో కలిసి నడిపిస్తున్నట్లు విచారణలో వెల్లడైంది.

ప్రతి లావాదేవీపై సుమారు 2% కమిషన్‌ను క్రిప్టోకరెన్సీ రూపంలో స్వీకరిస్తున్నట్లు పోలీసులు తెలిపారు. ముఖ్య నిందితుడికి విదేశీ సంబంధాలు ఉండగా, ముఖ్యంగా చైనీస్ నేషనల్స్‌తో పాటు ఆంధ్రప్రదేశ్‌కు చెందిన ఇద్దరు వ్యక్తులతో కూడా లింకులు ఉన్నట్లు సమాచారం.

బ్యాంకు సిబ్బంది ప్రమేయం బయటపడింది

ఈ కుంభకోణంలో బ్యాంకు సిబ్బంది కూడా కీలక పాత్ర పోషించినట్లు పోలీసులు వెల్లడించారు. కిసాన్ నగర్‌లోని

RBL Bank Limited కు చెందిన మేనేజర్ భువనగిరి కళ్యాణ్, క్యాషియర్ ఆయేషా బేగం ఈ వ్యవహారంలో సహకరించినట్లు తేలింది.

వర్చువల్ ఖాతాల ద్వారా సుమారు రూ.12 కోట్లు, అలాగే ఆర్‌బిఎల్ బ్యాంక్‌కు చెందిన ఏడు మ్యూల్ ఖాతాల ద్వారా రూ.125 కోట్లకు పైగా లావాదేవీలు జరిగినట్లు గుర్తించారు. మొత్తం కలిపి రూ.137 కోట్ల భారీ మోసం వెలుగులోకి వచ్చింది.