జిల్లాలో అక్రమ బెల్టు షాపుల దందా..? గ్రామాల్లో అక్రమ మద్యం విక్రయాలపై ఆరోపణలు

 

భద్రాద్రి కొత్తగూడెం జిల్లాలో బెల్టు షాపుల దందా గుట్టుచప్పుడు కాకుండా కొనసాగుతున్నట్లు స్థానికుల నుంచి ఆరోపణలు వినిపిస్తున్నాయి. ప్రభుత్వ నిబంధనలు కఠినంగా ఉన్నప్పటికీ గ్రామాలు, కాలనీలలో అక్రమంగా మద్యం విక్రయాలు జోరుగా సాగుతున్నట్లు సమాచారం. అధికారికంగా మద్యం దుకాణాలు ఉన్నప్పటికీ కొన్ని ఇళ్లలో, చిన్న చిన్న కిరాణా దుకాణాల్లో బెల్టు షాపులు నడుస్తున్నాయని స్థానికులు చెబుతున్నారు.

రాత్రి వేళల్లో జోరుగా అక్రమ వ్యాపారం

ముఖ్యంగా రాత్రి సమయాల్లో ఈ అక్రమ మద్యం వ్యాపారం ఎక్కువగా జరుగుతున్నట్లు తెలుస్తోంది. కొంతమంది వ్యక్తులు మద్యం బాటిళ్లను పెద్ద మొత్తంలో కొనుగోలు చేసి గ్రామాల్లోని మద్యం ప్రియులకు ‘నైంటీ’, ‘క్వార్టర్’లుగా విక్రయిస్తూ అధిక లాభాలు పొందుతున్నారని సమాచారం. ఒక్కో బాటిల్‌పై అధిక ధరలు వసూలు చేస్తూ బెల్టు దందాను లాభాల వ్యాపారంగా మార్చుకున్నారని స్థానికులు ఆరోపిస్తున్నారు.

యువత భవిష్యత్తుపై ప్రభావం

గ్రామాల్లో బెల్టు షాపులు పెరగడం వల్ల యువత మద్యానికి బానిసలుగా మారుతున్నారని పెద్దలు ఆందోళన వ్యక్తం చేస్తున్నారు. రోజువారీ కూలీ సంపాదనలో సగం మద్యానికే ఖర్చు చేస్తూ ఉండడంతో కుటుంబాల్లో ఆర్థిక ఇబ్బందులు తలెత్తుతున్నాయని మహిళలు చెబుతున్నారు. మద్యం మత్తులో ఇంట్లో గొడవలు జరుగుతుండటంతో కొన్ని చోట్ల కుటుంబ కలహాలు కూడా పెరుగుతున్నాయని స్థానికులు ఆవేదన వ్యక్తం చేస్తున్నారు.

కఠిన చర్యలు తీసుకోవాలని ప్రజల డిమాండ్

జిల్లాలో కొనసాగుతున్న ఈ బెల్టు షాపుల దందాపై పోలీసులు, ఎక్సైజ్ అధికారులు ప్రత్యేక దృష్టి సారించి కఠిన చర్యలు తీసుకోవాలని ప్రజలు డిమాండ్ చేస్తున్నారు. అక్రమ మద్యం విక్రయాలను పూర్తిగా అరికట్టి గ్రామాల్లో శాంతియుత వాతావరణం నెలకొల్పాలని అధికారులను కోరుతున్నారు.