రేపు తెలంగాణ కేబినెట్ భేటీ – ఉద్యోగుల సమస్యలే ప్రధాన అజెండా

హైదరాబాద్, మే 3: తెలంగాణలో ప్రభుత్వ ఉద్యోగులు, పెన్షనర్లకు సంబంధించిన కీలక నిర్ణయాలకు వేదికగా రేపటి కేబినెట్ సమావేశం నిలవనుంది. ముఖ్యమంత్రి రేవంత్ రెడ్డి అధ్యక్షతన మే 4న మధ్యాహ్నం 3 గంటలకు డాక్టర్ బి.ఆర్. అంబేద్కర్ సచివాలయం లో రాష్ట్ర మంత్రివర్గ సమావేశం జరగనుంది. ఈ మేరకు ప్రభుత్వ ప్రధాన కార్యదర్శి అధికారిక ఉత్తర్వులు జారీ చేశారు.

ఈ భేటీలో ప్రధానంగా ప్రభుత్వ ఉద్యోగులు, పెన్షనర్ల దీర్ఘకాలిక సమస్యల పరిష్కారంపై చర్చ జరగనుంది. ముఖ్యంగా గత కొంతకాలంగా పెండింగ్‌లో ఉన్న సుమారు ₹14,000 కోట్ల బకాయిల క్లియరెన్స్‌పై ప్రభుత్వం స్పష్టమైన కార్యాచరణ ప్రణాళికను సిద్ధం చేయనుందని సమాచారం. ఇందులో భాగంగా రిటైర్డ్ ఉద్యోగులకు ఇవ్వాల్సిన సుమారు ₹6,000 కోట్ల చెల్లింపుల ప్రక్రియను వేగవంతం చేసే దిశగా కీలక నిర్ణయాలు తీసుకునే అవకాశముంది.

ఇదిలా ఉంటే, వివిధ డిమాండ్ల సాధన కోసం మే 5న సమ్మెకు దిగుతామని ఉద్యోగ జేఏసీ ప్రకటించిన నేపథ్యంలో ప్రభుత్వం అప్రమత్తమైంది. ఈ ఉద్రిక్తతను తగ్గించేందుకు ఉద్యోగులకు ఇచ్చిన హామీల అమలుపై కేబినెట్‌లో విస్తృత చర్చ జరగనుంది. కొత్త హెల్త్ కార్డుల జారీ, పీఆర్సీ (PRC) నివేదికపై చర్యలు, పెండింగ్ అలవెన్సుల చెల్లింపుల అంశాలు చర్చకు రానున్నాయి.

అలాగే ఇటీవల ఉద్యోగ సంఘాల ప్రతినిధులతో జరిగిన చర్చల సారాంశాన్ని మంత్రివర్గం ముందు ఉంచి, వారికి సంతృప్తికరమైన నిర్ణయాలు తీసుకునే అవకాశముంది. ఇదే సమయంలో రాష్ట్రంలో అమలవుతున్న గ్యారెంటీ పథకాల పురోగతి, రాబోయే వానాకాలం వ్యవసాయ ప్రణాళికలపై కూడా దిశానిర్దేశం చేయనున్నారు.

మొత్తంగా, ఈ కేబినెట్ సమావేశం ఉద్యోగుల సమస్యల పరిష్కారంలో కీలక మలుపు తీసుకురానుందనే ఆశలు వ్యక్తమవుతున్నాయి.