12 ఏళ్ల బాలిక మిస్సింగ్ కేసు సుఖాంతం.. పోలీసుల చాకచక్యంతో సురక్షితంగా రక్షణ

హైదరాబాద్, మే 4: నగరంలో కలకలం రేపిన 12 ఏళ్ల బాలిక మిస్సింగ్ కేసు చివరకు సుఖాంతమైంది. సంతోష్‌నగర్ పోలీస్ స్టేషన్ పరిధిలో నివసించే నజియా అనే బాలిక కనిపించకుండా పోవడంతో కుటుంబ సభ్యులు తీవ్ర ఆందోళనకు గురయ్యారు.

బాలిక తండ్రి రఫీక్ ఫిర్యాదు మేరకు పోలీసులు వెంటనే కేసు నమోదు చేసి గాలింపు చర్యలు ప్రారంభించారు. లుక్‌అవుట్ నోటీసు జారీ చేసి అన్ని కోణాల్లో దర్యాప్తు చేపట్టారు.

ఈ క్రమంలో కేసు కీలక మలుపు తిరిగింది. చంద్రాయణగుట్ట పోలీసులకు బాలాపూర్ సమీపంలోని ఒక నాలాలో బాలిక పడిఉన్నట్లు సమాచారం అందింది. వెంటనే ఇన్‌స్పెక్టర్ గోపి తన బృందంతో అక్కడికి చేరుకుని బాలికను రక్షించారు. ఆమెకు ప్రాథమిక చికిత్స అందించారు.

తర్వాత సంతోష్‌నగర్ పోలీసులకు సమాచారం అందించగా, రక్షించిన బాలిక మిస్సింగ్ అయిన నజియానే అని నిర్ధారించారు. అనంతరం ఆమె తండ్రికి సమాచారం ఇచ్చారు.

సామాజిక సేవలో భాగంగా నారి నికేతన్ ఫౌండేషన్ ప్రతినిధి సఫియా మహిని ఘటనాస్థలికి చేరుకుని బాలికకు శుభ్రత, కౌన్సెలింగ్ అందించారు. బాలిక మానసిక స్థితిని పరిశీలిస్తూ ఆమెకు ధైర్యం చెప్పారు.

ఇన్‌స్పెక్టర్ గోపి సమక్షంలో బాలికను తండ్రి రఫీక్‌కు అప్పగించారు. కుమార్తె సురక్షితంగా తిరిగి లభించడంతో కుటుంబ సభ్యులు ఊపిరి పీల్చుకున్నారు.

ఈ ఘటనలో పోలీసులు చూపిన అప్రమత్తత, వేగవంతమైన స్పందనపై ప్రజలు ప్రశంసలు కురిపిస్తున్నారు. మిస్సింగ్ కేసును తక్షణమే ఛేదించి బాలికను సురక్షితంగా కుటుంబానికి చేర్చడం పోలీసుల పనితీరుకు నిదర్శనంగా నిలిచింది.