కల్తీ మద్యం త్రాగి.. 15 మంది మృతి, పలువురి పరిస్థితి విషమం

మహారాష్ట్ర రాష్ట్రంలో కల్తీ మద్యం మళ్లీ ప్రాణాలు బలిగొన్న విషాద ఘటన తీవ్ర కలకలం రేపుతోంది. పింప్రి-చించ్వాడ్, పుణె జిల్లాలోని పలు ప్రాంతాల్లో కల్తీ మద్యం సేవించి ఇప్పటివరకు 15 మంది మృతిచెందగా, మరికొందరి పరిస్థితి అత్యంత విషమంగా ఉన్నట్లు అధికారులు వెల్లడించారు.

పోలీసుల వివరాల ప్రకారం.. పింప్రి-చించ్వాడ్ పరిధిలోని దాపోడి, ఫుగేవాడి ప్రాంతాల్లో అత్యధికంగా 8 మంది ప్రాణాలు కోల్పోయారు. అలాగే పుణె నగరంలోని కాలేపడల్ ప్రాంతంలో ముగ్గురు, హడప్సర్ ప్రాంతంలో మరో ఇద్దరు మృతిచెందారు. చికిత్స పొందుతూ మరికొందరు కూడా మరణించినట్లు సమాచారం.

ఆసుపత్రుల్లో చికిత్స పొందుతున్న బాధితుల్లో చాలామంది తీవ్ర అస్వస్థతకు గురయ్యారు. కొందరికి చూపు పూర్తిగా కోల్పోవడం, మరికొందరికి శ్వాస తీసుకోవడంలో తీవ్ర ఇబ్బందులు తలెత్తడం, అంతర్గత అవయవాలు పనిచేయకపోవడం వంటి ప్రాణాపాయ పరిస్థితులు ఎదురవుతున్నాయని వైద్యులు తెలిపారు. దీంతో మృతుల సంఖ్య మరింత పెరిగే అవకాశముందని అధికారులు ఆందోళన వ్యక్తం చేస్తున్నారు.

ప్రాథమిక దర్యాప్తులో మద్యంలో ప్రమాదకరమైన మిథనాల్‌ను అధిక మోతాదులో కలిపినట్లు పోలీసులు గుర్తించారు. తక్కువ ఖర్చుతో అక్రమంగా మద్యం తయారు చేసి విక్రయించేందుకు ఈ రసాయనాన్ని ఉపయోగించినట్లు అనుమానిస్తున్నారు.

ఈ ఘటనలో ప్రధాన నిందితుడిగా భావిస్తున్న యోగేష్ వాంఖడేను పోలీసులు అరెస్ట్ చేశారు. అతడి నుంచి కీలక సమాచారం సేకరిస్తున్నట్లు తెలుస్తోంది. ఈ కల్తీ మద్యం తయారీ, సరఫరా వెనుక మరెవరైనా ఉన్నారా? రసాయనాలు ఎక్కడి నుంచి తెప్పించారు? అనే కోణాల్లో పోలీసులు లోతుగా విచారణ కొనసాగిస్తున్నారు.

ఈ ఘటనతో మహారాష్ట్రలో అక్రమ మద్యం వ్యాపారంపై మరోసారి తీవ్ర ఆందోళనలు వ్యక్తమవుతున్నాయి. ప్రజలు అనుమానాస్పదంగా విక్రయించే మద్యం కొనుగోలు చేయవద్దని అధికారులు హెచ్చరిస్తున్నారు.