సర్వీస్‌లో ఉన్న టీచర్లకు టెట్ తప్పనిసరి: సుప్రీంకోర్టు కీలక తీర్పు

హైదరాబాద్, మే 30: దేశవ్యాప్తంగా ప్రభుత్వ పాఠశాలల్లో విధులు నిర్వహిస్తున్న ఉపాధ్యాయులు టీచర్ ఎలిజిబిలిటీ టెస్ట్ (TET) ఉత్తీర్ణత సాధించడం తప్పనిసరి అని సుప్రీంకోర్టు మరోసారి స్పష్టం చేసింది. అయితే ఉపాధ్యాయులకు కొంత ఊరటనిస్తూ టెట్ పాస్ కావడానికి ఇచ్చిన గడువును 2027 ఆగస్టు 31 నుంచి 2028 ఆగస్టు 31 వరకు పొడిగించింది.

జస్టిస్ దీపాంకర్ దత్తా మరియు జస్టిస్ మన్మోహన్లతో కూడిన ధర్మాసనం శుక్రవారం ఈ మేరకు తీర్పు వెలువరించింది. గతంలో ఇచ్చిన చారిత్రాత్మక తీర్పును సవాల్ చేస్తూ వివిధ ఉపాధ్యాయ సంఘాలు దాఖలు చేసిన రివ్యూ పిటిషన్లను కోర్టు పూర్తిగా తిరస్కరించింది. అయితే ఉపాధ్యాయుల భవిష్యత్తు, విద్యార్థుల విద్యాభ్యాసంపై ప్రభావాన్ని పరిగణనలోకి తీసుకుని టెట్ అర్హత సాధించేందుకు అదనంగా మరో ఏడాది గడువు ఇచ్చింది.

గత తీర్పులో మార్పు ఒక్కటే

తాజా ఉత్తర్వుల ప్రకారం టెట్ ఉత్తీర్ణత సాధించేందుకు ఉన్న గడువు మాత్రమే పొడిగించబడింది. మిగిలిన అన్ని అంశాలు యథాతథంగా అమలులో ఉంటాయని సుప్రీంకోర్టు స్పష్టం చేసింది.

గతంలో 2025 సెప్టెంబర్ 1న ఇచ్చిన తీర్పులో, విద్యాహక్కు చట్టం (RTE Act) అమలుకు ముందు నియమితులై, పదవీ విరమణకు ఐదేళ్లకు పైగా సర్వీసు ఉన్న ఉపాధ్యాయులు ఉద్యోగంలో కొనసాగాలన్నా, పదోన్నతులు పొందాలన్నా టెట్ పాస్ కావాల్సిందే అని ఆదేశించింది.

ఉపాధ్యాయ సంఘాల రివ్యూ పిటిషన్లు కొట్టివేత

సుప్రీంకోర్టు నిర్ణయంపై దేశవ్యాప్తంగా ఉపాధ్యాయ సంఘాలు తీవ్ర అభ్యంతరం వ్యక్తం చేశాయి. దీంతో సుమారు 69 ఉపాధ్యాయ సంఘాలు గత ఏడాది అక్టోబర్‌లో రివ్యూ పిటిషన్లు దాఖలు చేశాయి.

ఈ పిటిషన్లపై ఈ నెల 13న విస్తృతంగా వాదనలు విన్న ధర్మాసనం తీర్పును రిజర్వ్ చేసింది. అనంతరం శుక్రవారం తుది తీర్పు వెలువరిస్తూ అన్ని రివ్యూ పిటిషన్లను తిరస్కరించింది.

కోర్టు వ్యాఖ్యలు

విద్యాహక్కు చట్టం అమల్లోకి వచ్చి 15 ఏళ్లు దాటినప్పటికీ టెట్ అర్హత సాధించేందుకు తగినంత సమయం లభించలేదని ఉపాధ్యాయులు వాదించడం సమంజసం కాదని ధర్మాసనం అభిప్రాయపడింది.

అయితే విద్యా వ్యవస్థలో నాణ్యత పెంపు, విద్యార్థులకు అర్హత కలిగిన ఉపాధ్యాయులను అందుబాటులో ఉంచడం లక్ష్యంగా టెట్ అర్హతను తప్పనిసరి చేస్తున్నామని కోర్టు స్పష్టం చేసింది.

దీంతో దేశవ్యాప్తంగా వేలాది మంది ప్రభుత్వ ఉపాధ్యాయులు 2028 ఆగస్టు 31లోపు టెట్ పరీక్షలో ఉత్తీర్ణత సాధించాల్సిన పరిస్థితి ఏర్పడింది.