11 వివాహాలు.. 18 మంది మహిళలతో సంబంధాలు.. వీడియోలతో బ్లాక్మెయిల్
బెంగళూరు: వివాహిత మహిళలను లక్ష్యంగా చేసుకుని వారితో సన్నిహిత సంబంధాలు ఏర్పరచుకోవడం, ఆ దృశ్యాలను రహస్యంగా చిత్రీకరించి బ్లాక్మెయిల్కు పాల్పడినట్లు ఆరోపణలు ఎదుర్కొంటున్న వ్యక్తిపై కర్ణాటకలో కేసు నమోదైంది. బెంగళూరు రూరల్ జిల్లా ఆనేకల్ తాలూకాలోని సర్జాపూర్ పోలీస్ స్టేషన్ పరిధిలో రాకేష్ అనే వ్యక్తిపై పలు తీవ్రమైన ఆరోపణలతో పోలీసులు దర్యాప్తు చేపట్టారు.
పోలీసుల సమాచారం ప్రకారం, నిందితుడు తనను మంచి వ్యక్తిగా పరిచయం చేసుకుని మహిళల నమ్మకాన్ని సంపాదించేవాడని ఆరోపణలు ఉన్నాయి. అనంతరం వారితో శారీరక సంబంధాలు పెట్టుకుని, వాటిని వీడియో తీసి బెదిరింపులకు పాల్పడినట్లు ఫిర్యాదులో పేర్కొన్నారు. అతనికి సుమారు 18 మంది మహిళలతో సంబంధాలు ఉన్నాయని, అలాగే పలుమార్లు వివాహాలు చేసుకున్నాడని కూడా ఆరోపణలు ఉన్నాయి.
ఈ ఏడాది ఫిబ్రవరి 22న హెబ్బగోడికి చెందిన భవ్య అనే యువతిని వివాహం చేసుకున్న రాకేష్, అనంతరం రూ.1 కోటి వరకట్నం కోసం వేధింపులకు గురిచేసినట్లు ఆమె ఫిర్యాదు చేసింది. భర్త గత సంబంధాలు, వీడియోల విషయం తెలిసిన తర్వాత తనపై పెట్రోల్ పోసి హత్యాయత్నం చేశాడని కూడా ఆమె ఆరోపించింది.
ఈ ఫిర్యాదు ఆధారంగా వరకట్న వేధింపులు, ప్రాణహాని, ఇతర నేరాల కింద సర్జాపూర్ పోలీసులు కేసు నమోదు చేసి దర్యాప్తు కొనసాగిస్తున్నారు. నిందితుడిపై ఉన్న వీడియోలు, ఇతర డిజిటల్ ఆధారాలను కూడా పోలీసులు పరిశీలిస్తున్నట్లు సమాచారం.
గమనిక: ప్రస్తుతం ఇవన్నీ పోలీసు కేసులో నమోదైన ఆరోపణలు మాత్రమే. దర్యాప్తు పూర్తయ్యే వరకు నిందితుడిపై వచ్చిన ఆరోపణలు న్యాయపరంగా ఇంకా నిర్ధారణ కాలేదు.
Post a Comment