సముద్ర అలలకు ముగ్గురు చిన్నారులు కొట్టుకుపోగా బాలుడు మృతి, బాలిక గల్లంతు

కోడూరు బీచ్‌లో విషాదం.. సముద్ర అలలకు ముగ్గురు చిన్నారులు కొట్టుకుపోగా బాలుడు మృతి, బాలిక గల్లంతు

నెల్లూరు, జూన్ 28: పొట్టి శ్రీరాములు నెల్లూరు జిల్లాలోని కోడూరు సముద్ర తీరంలో ఆదివారం విషాదకర ఘటన చోటుచేసుకుంది. సముద్ర స్నానానికి వెళ్లిన ముగ్గురు చిన్నారులు అలల ఉధృతికి కొట్టుకుపోవడంతో ఒక బాలుడు మృతి చెందగా, ఒక బాలికను స్థానికులు సురక్షితంగా రక్షించారు. మరో బాలిక గల్లంతుకావడంతో ఆమె కోసం సహాయక బృందాలు ముమ్మరంగా గాలింపు చర్యలు చేపట్టాయి.

పోలీసులు తెలిపిన వివరాల ప్రకారం, చిత్తూరు జిల్లా సోమల మండలం కందూరుకు చెందిన ఒక కుటుంబం నెల్లూరులో జరుగుతున్న రొట్టెల పండుగకు హాజరయ్యేందుకు వచ్చింది. అనంతరం కుటుంబ సభ్యులంతా విహారయాత్రలో భాగంగా కోడూరు బీచ్‌కు వెళ్లారు.

ఈ సందర్భంగా ముగ్గురు చిన్నారులు సముద్రంలో స్నానం చేస్తుండగా, ఒక్కసారిగా భారీ అలలు వారిని లోపలికి లాక్కెళ్లాయి. ప్రమాదాన్ని గమనించిన స్థానిక మత్స్యకారులు వెంటనే సముద్రంలోకి దిగి ఒక బాలికను సురక్షితంగా ఒడ్డుకు తీసుకొచ్చారు.

అయితే, సుఫియాన్ (4) అనే బాలుడు నీటిలో మునిగి మృతి చెందాడు. మరో బాలిక ఆచూకీ ఇంకా లభించకపోవడంతో గజ ఈతగాళ్లు, స్థానిక మత్స్యకారులు, అధికారులు కలిసి గాలింపు చర్యలను కొనసాగిస్తున్నారు.

సమాచారం అందుకున్న పోలీసులు, రెవెన్యూ అధికారులు ఘటనాస్థలానికి చేరుకుని సహాయక చర్యలను పర్యవేక్షించారు. ఈ విషాద ఘటనతో బాధిత కుటుంబ సభ్యులు కన్నీరుమున్నీరుగా విలపించగా, కోడూరు తీర ప్రాంతంలో విషాద ఛాయలు అలుముకున్నాయి.

అధికారులు సముద్రంలో అలల ఉధృతి ఎక్కువగా ఉన్న సమయంలో పర్యాటకులు, చిన్నారులు సముద్రంలోకి దిగకుండా అప్రమత్తంగా ఉండాలని సూచించారు.