సింగరేణిలో కల్వకుంట్ల కవిత ‘బాయిబాట’.. ఈనెల 15 నుంచి కోల్‌బెల్ట్ ప్రాంతాల్లో విస్తృత పర్యటన

గోదావరిఖని, జూన్ 9: తెలంగాణ రక్షణ సేన (టీఆర్ఎస్) చీఫ్ కల్వకుంట్ల కవిత సింగరేణి కార్మికుల సమస్యలు, సంక్షేమం, ఉద్యోగ భద్రత వంటి అంశాలను తెలుసుకునేందుకు ఈ నెల 15వ తేదీ నుంచి కోల్‌బెల్ట్ ప్రాంతాల్లో విస్తృత పర్యటన చేపట్టనున్నారు. ‘బాయిబాట’ పేరుతో నిర్వహించనున్న ఈ కార్యక్రమంలో భాగంగా అండర్‌గ్రౌండ్, ఓపెన్‌కాస్ట్ బొగ్గు గనులను సందర్శిస్తూ కార్మికులతో నేరుగా మమేకం కానున్నారు.

ఈ పర్యటనను సింగరేణి కార్మికులు పెద్దఎత్తున జయప్రదం చేయాలని హెచ్‌ఎంఎస్ జాతీయ కార్యదర్శి ఖాజీ మొహమ్మద్ ఇస్మాయిల్ నిజామీ పిలుపునిచ్చారు. సింగరేణి ప్రాంతంలో పనిచేస్తున్న కార్మికులు ఎదుర్కొంటున్న సమస్యలు, గనుల నిర్వహణ, ఉద్యోగ భద్రత, సంక్షేమ పథకాల అమలు తదితర అంశాలపై వారి అభిప్రాయాలను ప్రత్యక్షంగా తెలుసుకోవడమే ఈ పర్యటన ముఖ్య ఉద్దేశమని నాయకులు తెలిపారు.

పర్యటనలో భాగంగా కవిత వివిధ గనుల ప్రాంతాలను సందర్శించి కార్మికులతో సమావేశాలు నిర్వహించనున్నారు. గనుల్లోని ప్రస్తుత పరిస్థితులు, కార్మికుల అవసరాలు, భవిష్యత్ సవాళ్లపై చర్చిస్తూ వారి అభిప్రాయాలను సేకరించనున్నారు. కోల్‌బెల్ట్ ప్రాంతంలో కార్మిక వర్గంతో మరింత దగ్గర కావాలనే లక్ష్యంతో ఈ కార్యక్రమాన్ని రూపొందించినట్లు పార్టీ వర్గాలు వెల్లడించాయి.

తొలి విడత ఆరు రోజుల పర్యటన షెడ్యూల్

జూన్ 15: మందమర్రి ప్రాంతంలోని బొగ్గు గనుల సందర్శన
జూన్ 16: శ్రీరాంపూర్ ఏరియాలో కార్మికులతో సమావేశం
జూన్ 17: ఆర్‌జీ-1 ఏరియాలో పర్యటన
జూన్ 18: ఆర్‌జీ-2 ఏరియాలో కార్మికులతో భేటీ
జూన్ 19: అడ్రియాల లాంగ్‌వాల్ ప్రాజెక్ట్, ఆర్‌జీ-3 ఏరియాలో పర్యటన
జూన్ 20: భూపాలపల్లి ఏరియాలోని బొగ్గు గనులు, ఓపెన్‌కాస్ట్ ప్రాజెక్టుల వద్ద కార్మికులతో సమావేశం

సింగరేణి ప్రాంతాల్లో చేపడుతున్న ఈ ‘బాయిబాట’ కార్యక్రమం రాజకీయంగా కూడా ప్రాధాన్యత సంతరించుకుంది. కార్మికుల సమస్యలను వెలుగులోకి తీసుకురావడంతో పాటు వారి అభిప్రాయాలను నేరుగా తెలుసుకుని వాటిని ప్రభుత్వ దృష్టికి తీసుకెళ్లడమే లక్ష్యమని పార్టీ నేతలు, హెచ్‌ఎంఎస్ నాయకులు పేర్కొన్నారు. కోల్‌బెల్ట్ ప్రాంతంలో కార్మిక వర్గం నుంచి ఈ కార్యక్రమానికి మంచి స్పందన లభించే అవకాశం ఉందని వారు ఆశాభావం వ్యక్తం చేస్తున్నారు.