2 లక్షలు లంచం తీసుకుంటూ ఏసీబీకి చిక్కిన అసిస్టెంట్ ఎగ్జిక్యూటివ్ ఇంజనీర్

భద్రాద్రి కొత్తగూడెం జిల్లా అశ్వారావుపేటలో పనిచేస్తున్న నీటిపారుదల శాఖ అసిస్టెంట్ ఎగ్జిక్యూటివ్ ఇంజనీర్ లచ్చుబుక్త శ్రీనివాస్ రావు అవినీతి నిరోధక శాఖ (ఏసీబీ) అధికారులకు రెడ్‌హ్యాండెడ్‌గా పట్టుబడ్డారు.

ఏసీబీ ఖమ్మం రేంజ్ అధికారులు తెలిపిన వివరాల ప్రకారం.. అశ్వారావుపేట గ్రామం, మండలానికి చెందిన ఫిర్యాదుదారుడి మామకు చెందిన వ్యవసాయ భూమి పక్కన ఉన్న దొంతికుంట చెరువు నుంచి మట్టిని తవ్వి, ఆ భూమిలోని గుంతలను పూడ్చేందుకు మట్టి తరలించేందుకు అనుమతి ఇవ్వాల్సి ఉంది. ఈ అధికారిక అనుమతి మంజూరు చేయడానికి అసిస్టెంట్ ఎగ్జిక్యూటివ్ ఇంజనీర్ లచ్చుబుక్త శ్రీనివాస్ రావు రూ.2 లక్షల లంచం డిమాండ్ చేశాడు.

ఈ నేపథ్యంలో ఫిర్యాదుదారుడు ఏసీబీ అధికారులను ఆశ్రయించగా, వారి సూచన మేరకు సోమవారం (జూన్ 29) అశ్వారావుపేటలోని డిప్యూటీ ఎగ్జిక్యూటివ్ ఇంజనీర్ కార్యాలయంలో రూ.2 లక్షల లంచం తీసుకుంటున్న సమయంలో ఏసీబీ అధికారులు శ్రీనివాస్ రావును రెడ్‌హ్యాండెడ్‌గా పట్టుకున్నారు.

నిందితుడి వద్ద నుంచి రూ.2 లక్షల లంచం నగదును స్వాధీనం చేసుకున్నారు. అధికారిక విధులను దుర్వినియోగం చేస్తూ అక్రమ ప్రయోజనం పొందేందుకు లంచం స్వీకరించినట్లు ఏసీబీ వెల్లడించింది.

నిందితుడిని అరెస్టు చేసి వరంగల్‌లోని ఏసీబీ ప్రత్యేక న్యాయస్థానంలో హాజరుపరచనున్నట్లు అధికారులు తెలిపారు. కేసు దర్యాప్తు కొనసాగుతోంది. భద్రతా కారణాల దృష్ట్యా ఫిర్యాదుదారుడి వివరాలను గోప్యంగా ఉంచినట్లు ఏసీబీ పేర్కొంది.

లంచం డిమాండ్ చేసిన ప్రభుత్వ ఉద్యోగులపై ఫిర్యాదు చేయాలనుకునే ప్రజలు ఏసీబీ టోల్‌ఫ్రీ నంబర్ 1064కు సంప్రదించాలని అధికారులు సూచించారు. అలాగే వాట్సాప్ (9440446106), ఫేస్‌బుక్ (Telangana ACB), ఎక్స్ (@Telangana ACB) ద్వారా కూడా ఫిర్యాదులు చేయవచ్చని తెలిపారు. ఫిర్యాదుదారుల వివరాలను పూర్తిగా గోప్యంగా ఉంచుతామని ఏసీబీ స్పష్టం చేసింది.