తెలంగాణ ఉద్యోగులు, పెన్షనర్లకు కీలక నిర్ణయం.. ఎంప్లాయీస్ హెల్త్ స్కీమ్ అమలుకు ప్రభుత్వం ఉత్తర్వులు

 తెలంగాణ ఉద్యోగులు, పెన్షనర్లకు కీలక నిర్ణయం.. ఎంప్లాయీస్ హెల్త్ స్కీమ్ అమలుకు ప్రభుత్వం ఉత్తర్వులు

హైదరాబాద్: తెలంగాణ ప్రభుత్వం ప్రభుత్వ ఉద్యోగులు, పెన్షనర్ల కోసం అమలు చేస్తున్న ఎంప్లాయీస్ హెల్త్ స్కీమ్ (EHS) అమలుకు సంబంధించి కీలక ఉత్తర్వులు జారీ చేసింది. ఈ ఉత్తర్వుల ప్రకారం 2026 మే నెల వేతనం లేదా పెన్షన్‌కు సంబంధించిన జూన్ నెల చెల్లింపుల నుంచే ఎంప్లాయీస్ హెల్త్ స్కీమ్ (EHS) ఫండ్‌కు విరాళాల మినహాయింపు అమల్లోకి రానుంది.

ప్రభుత్వం జారీ చేసిన ఆదేశాల మేరకు ప్రభుత్వ ఉద్యోగులు తమ బేసిక్ పేలో 1.5 శాతం, పెన్షనర్లు తమ బేసిక్ పెన్షన్‌లో 1.5 శాతం మొత్తాన్ని ప్రతి నెల ఎంప్లాయీస్ హెల్త్ స్కీమ్ (EHS) ఫండ్‌కు చెల్లించాల్సి ఉంటుంది. ఈ మొత్తాన్ని వేతనం లేదా పెన్షన్ చెల్లించే సమయంలోనే నేరుగా మినహాయించనున్నారు.

అలాగే భార్యాభర్తలిద్దరూ ప్రభుత్వ ఉద్యోగులైతే ఇద్దరి నుంచి కాకుండా ఒకరి వేతనం నుంచి మాత్రమే 1.5 శాతం మినహాయింపు చేయాలని ప్రభుత్వం స్పష్టం చేసింది. దీంతో ఒకే కుటుంబానికి చెందిన ఇద్దరు ఉద్యోగులపై అదనపు ఆర్థిక భారం పడకుండా చర్యలు తీసుకుంది.

ప్రభుత్వ ఉద్యోగులు, పెన్షనర్లకు మెరుగైన వైద్య సేవలు అందించడమే ఎంప్లాయీస్ హెల్త్ స్కీమ్ ప్రధాన ఉద్దేశమని ప్రభుత్వం పేర్కొంది. రాష్ట్రవ్యాప్తంగా ఈ ఉత్తర్వులు తక్షణమే అమల్లోకి వస్తాయని, సంబంధిత శాఖలు అవసరమైన చర్యలు చేపట్టాలని ఆదేశించింది.

ఈ నిర్ణయంతో రాష్ట్రంలోని లక్షలాది మంది ప్రభుత్వ ఉద్యోగులు, పెన్షనర్లు ఎంప్లాయీస్ హెల్త్ స్కీమ్ పరిధిలో మరింత వ్యవస్థీకృతంగా వైద్య సేవలను పొందే అవకాశం ఏర్పడనుంది.