తెలంగాణ కొత్త సీఎస్‌గా సంజయ్ జాజు.. జూన్ 30న బాధ్యతల స్వీకరణ

 తెలంగాణ కొత్త సీఎస్‌గా సంజయ్ జాజు.. జూన్ 30న బాధ్యతల స్వీకరణ

హైదరాబాద్: తెలంగాణ రాష్ట్ర నూతన ప్రభుత్వ ప్రధాన కార్యదర్శి (సీఎస్)గా సీనియర్ ఐఏఎస్ అధికారి సంజయ్ జాజు నియమితులయ్యారు. ప్రస్తుతం సీఎస్‌గా కొనసాగుతున్న కే. రామకృష్ణారావు పదవీకాలం జూన్ 30తో ముగియనున్న నేపథ్యంలో, అదే రోజు సంజయ్ జాజు బాధ్యతలు స్వీకరించనున్నట్లు అధికారిక వర్గాలు వెల్లడించాయి.

1992 బ్యాచ్‌కు చెందిన సంజయ్ జాజు కేంద్ర ప్రభుత్వంలో వివిధ కీలక శాఖల్లో సుదీర్ఘకాలం సేవలందించారు. ముఖ్యంగా సమాచార, ప్రసార మంత్రిత్వ శాఖతో పాటు పలు కీలక విభాగాల్లో దాదాపు 13 సంవత్సరాలపాటు పనిచేసి పరిపాలనా అనుభవాన్ని సంపాదించారు. తెలంగాణ ప్రభుత్వ విజ్ఞప్తి మేరకు కేంద్ర ప్రభుత్వం ఆయనను తిరిగి తెలంగాణ కేడర్‌కు పంపించింది.

రాష్ట్ర అభివృద్ధికి కీలకంగా భావిస్తున్న పలు ప్రతిష్ఠాత్మక ప్రాజెక్టులకు కేంద్ర సహకారం మరింత వేగంగా పొందేందుకు ఈ నిర్ణయం తీసుకున్నట్లు తెలుస్తోంది. ముఖ్యమంత్రి ఎ. రేవంత్ రెడ్డి ప్రత్యేకంగా దృష్టి సారించిన హైదరాబాద్ మెట్రో విస్తరణ, మూసీ నది పునరుజ్జీవన ప్రాజెక్టు, రీజినల్ రింగ్ రోడ్, భారత్ ఫ్యూచర్ సిటీ వంటి భారీ ప్రాజెక్టులకు కేంద్రం నుంచి అనుమతులు, నిధులు సాధించడంలో సంజయ్ జాజు అనుభవం ఉపయోగపడుతుందని ప్రభుత్వం భావిస్తోంది.

కొత్త సీఎస్ ఎంపిక ప్రక్రియలో సీనియర్ ఐఏఎస్ అధికారులు జయేష్ రంజన్, వికాస్ రాజ్ పేర్లు కూడా పరిశీలనకు వచ్చినప్పటికీ, చివరకు ముఖ్యమంత్రి రేవంత్ రెడ్డి సంజయ్ జాజుపైనే విశ్వాసం ఉంచారు.

కేంద్ర ప్రభుత్వంలో ఆయనకు ఉన్న విస్తృత అనుభవం, పరిపాలనా నైపుణ్యం, ఉన్నతస్థాయి పరిచయాలు తెలంగాణ రాష్ట్ర అభివృద్ధి కార్యక్రమాలకు కొత్త ఊపునిస్తాయని అధికార వర్గాలు ఆశాభావం వ్యక్తం చేస్తున్నాయి. కాగా, సంజయ్ జాజు మార్చి 2028లో పదవీ విరమణ చేయనున్నారు. దీంతో దాదాపు రెండేళ్లకు పైగా ఆయన తెలంగాణ ప్రభుత్వ ప్రధాన కార్యదర్శిగా సేవలందించే అవకాశం ఉంది.