హైదరాబాద్‌లో అక్రమ లింగ నిర్ధారణ రాకెట్ భగ్నం.. ముగ్గురు అరెస్ట్

హైదరాబాద్, జూన్ 13: నగరంలోని ఎల్బీనగర్ పరిధిలో అక్రమంగా గర్భస్థ శిశువు లింగ నిర్ధారణ పరీక్షలు నిర్వహిస్తున్న రాకెట్‌ను పోలీసులు భగ్నం చేశారు. వనస్థలిపురంలోని ఓ ప్రైవేట్ ఆస్పత్రిలో నిర్వహించిన డికాయ్ ఆపరేషన్ ద్వారా ఈ వ్యవహారాన్ని వెలుగులోకి తెచ్చారు.

పోలీసుల వివరాల ప్రకారం, వనస్థలిపురంలో ఉన్న ఓ ప్రైవేట్ ఆస్పత్రిలో గర్భిణులకు చట్టవిరుద్ధంగా లింగ నిర్ధారణ పరీక్షలు చేయిస్తున్నట్లు సమాచారం అందడంతో ప్రత్యేక నిఘా ఏర్పాటు చేశారు. ఇందులో భాగంగా ఓ మహిళా పోలీసు సిబ్బందిని గర్భిణిగా నటిస్తూ ఆస్పత్రికి పంపారు. అక్కడి సిబ్బంది గర్భంలోని శిశువు లింగాన్ని తెలియజేస్తామని హామీ ఇవ్వడంతో పోలీసులు కీలక ఆధారాలను సేకరించారు.

దర్యాప్తులో భాగంగా ఆస్పత్రి డైరెక్టర్ కొర్ర రాజుతో పాటు మరో ఇద్దరిని అదుపులోకి తీసుకున్నారు. ఆస్పత్రి సిబ్బంది గర్భిణులను తుక్కుగూడలోని ఓ క్లినిక్‌కు పంపిస్తున్నట్లు గుర్తించారు. అనంతరం అక్కడ నిర్వహించిన తనిఖీల్లో లింగ నిర్ధారణ పరీక్షలు చేస్తున్న ల్యాబ్ టెక్నీషియన్ విజయ్ కుమార్‌ను పట్టుకున్నారు. అలాగే రిసెప్షనిస్ట్ లోకేశ్‌ను కూడా అరెస్ట్ చేశారు.

నిందితులపై ప్రీ-కన్సెప్షన్ అండ్ ప్రీ-నేటల్ డయాగ్నస్టిక్ టెక్నిక్స్ (PCPNDT) చట్టం కింద కేసులు నమోదు చేసిన పోలీసులు దర్యాప్తు కొనసాగిస్తున్నారు.

ఈ సందర్భంగా పోలీసులు మాట్లాడుతూ, గర్భంలోని శిశువు లింగాన్ని వెల్లడించడం చట్టరీత్యా నేరమని స్పష్టం చేశారు. బాలికల జనన నిష్పత్తిని దెబ్బతీసే ఇటువంటి అక్రమ కార్యకలాపాలను ఎట్టి పరిస్థితుల్లోనూ సహించబోమన్నారు. లింగ నిర్ధారణ పరీక్షలు నిర్వహించే వారిపైనా, వాటిని ప్రోత్సహించే వారిపైనా కఠిన చర్యలు తీసుకుంటామని హెచ్చరించారు.

ప్రస్తుతం కేసుకు సంబంధించి మరిన్ని వివరాలు సేకరిస్తున్న వనస్థలిపురం పోలీసులు, ఈ అక్రమ రాకెట్‌కు మరెవరైనా సంబంధం ఉన్నారా అనే కోణంలో విచారణ చేపట్టారు.