నల్లగొండలో కుటుంబం మొత్తం అదృశ్యం.. కలకలం రేపిన ఘటన

నల్లగొండలో కుటుంబం మొత్తం అదృశ్యం.. కలకలం రేపిన ఘటన

నల్లగొండ జిల్లా కేంద్రంలో ఓ కుటుంబం మొత్తం అదృశ్యమవడం స్థానికంగా కలకలం రేపుతోంది. జగిత్యాల జిల్లాకు చెందిన గిరి శ్రీకాంత్ తన భార్య లక్ష్మీ, ఇద్దరు పిల్లలతో కలిసి ఉపాధి కోసం ఆరేళ్ల క్రితం నల్లగొండకు వచ్చి స్థిరపడ్డాడు.

శ్రీకాంత్ దంపతులు నల్లగొండలోని ఓ కిరాణా దుకాణంలో పనిచేస్తూ మిర్యాలగూడ రోడ్డులోని బీటీఎస్ ప్రాంతం, శ్రీనివాస కాలనీలో అద్దె ఇంట్లో నివాసం ఉంటున్నారు. వీరికి హర్షిత అనే కుమార్తె, సాయి చరణ్ అనే కుమారుడు ఉన్నారు.

అయితే శనివారం నుంచి శ్రీకాంత్ కుటుంబ సభ్యులెవరూ కనిపించకపోవడంతో ఆందోళన చెందిన కిరాణా దుకాణ యజమాని వన్ టౌన్ పోలీస్ స్టేషన్‌లో ఫిర్యాదు చేశాడు. కుటుంబం ఒక్కసారిగా కనిపించకుండా పోవడంతో పోలీసులు కేసు నమోదు చేసి దర్యాప్తు ప్రారంభించారు.

ప్రాథమిక సమాచారం ప్రకారం, అప్పుల భారంతో కుటుంబం ఎవరికీ చెప్పకుండా వెళ్లిపోయి ఉండవచ్చని అనుమానిస్తున్నారు. అదే సమయంలో ఇతర కారణాలేమైనా ఉన్నాయా అనే కోణంలో కూడా విచారణ కొనసాగుతోంది. కుటుంబ సభ్యుల ఆచూకీ కోసం పోలీసులు ప్రత్యేక చర్యలు చేపట్టారు.

ఈ కుటుంబం గురించి ఎవరికైనా సమాచారం తెలిసినట్లయితే వెంటనే నల్లగొండ వన్ టౌన్ పోలీస్ స్టేషన్‌ను సంప్రదించాలని పోలీసులు కోరుతున్నారు.

సంప్రదించాల్సిన నంబర్లు:

• వన్ టౌన్ పోలీస్ స్టేషన్: 8712667670
• ఎస్‌ఐ జె. సైదులు: 8712577228

కుటుంబం ఆచూకీపై సమాచారం అందించిన వారి వివరాలు గోప్యంగా ఉంచుతామని పోలీసులు తెలిపారు. ప్రస్తుతం ఈ ఘటన నల్లగొండ జిల్లాలో చర్చనీయాంశంగా మారింది.