మీనాక్షి నటరాజన్ రాజ్యసభ నామినేషన్ తిరస్కరణపై బీజేపీపై టీపీసీసీ అధ్యక్షుడు మహేష్ కుమార్ గౌడ్ విమర్శలు

మీనాక్షి నటరాజన్ రాజ్యసభ నామినేషన్ తిరస్కరణపై బీజేపీపై టీపీసీసీ అధ్యక్షుడు మహేష్ కుమార్ గౌడ్ విమర్శలు

హైదరాబాద్, జూన్ 10: మధ్యప్రదేశ్ రాజ్యసభ ఎన్నికల్లో కాంగ్రెస్ నేత మీనాక్షి నటరాజన్ నామినేషన్ తిరస్కరణ ఘటనపై తెలంగాణ ప్రదేశ్ కాంగ్రెస్ కమిటీ (టీపీసీ‌సీ) అధ్యక్షుడు మహేష్ కుమార్ గౌడ్ తీవ్ర ఆగ్రహం వ్యక్తం చేశారు. ఈ ఘటన బీజేపీ రాజకీయ కుట్రలకు పరాకాష్ట అని ఆయన ఆరోపించారు.

బీజేపీ ఒక్కో కుట్రతో దేశంలో ప్రజాస్వామ్యాన్ని ఖూనీ చేస్తోందని, రాజ్యసభ ఎన్నికల్లో జరిగిన పరిణామాలు ప్రజాస్వామ్య విలువలకు విరుద్ధమని మహేష్ కుమార్ గౌడ్ పేర్కొన్నారు. మీనాక్షి నటరాజన్ నామినేషన్ తిరస్కరణ వెనుక రాజకీయ ఉద్దేశాలు ఉన్నాయని ఆయన విమర్శించారు.

ఇప్పటికే ఓటర్ల జాబితాల నుంచి ఓట్లను తొలగించడం, దొంగ ఓట్లను నమోదు చేయడం, ప్రజాప్రతినిధులను అక్రమంగా తమ పార్టీలో చేర్చుకోవడం వంటి చర్యలు బీజేపీ రాజకీయాల్లో సాధారణమైపోయాయని ఆయన ఆరోపించారు. ఎన్నికల ప్రక్రియలో నిష్పాక్షికత దెబ్బతింటోందని, ఎన్నికల వ్యవస్థపై ప్రజల విశ్వాసం దెబ్బతినే పరిస్థితులు ఏర్పడుతున్నాయని అన్నారు.

అలాగే, భారత ఎన్నికల కమిషన్ స్వతంత్రంగా వ్యవహరించకుండా బీజేపీ అనుబంధ సంస్థలా పనిచేస్తోందని కాంగ్రెస్ పార్టీ తరఫున విమర్శలు గుప్పించారు. "మొన్నటి వరకు ఓట్లు చోరీ చేసిన బీజేపీ, ఇప్పుడు ఏకంగా సీట్లు చోరీ చేసే స్థాయికి వెళ్లింది" అని ఆయన తీవ్ర వ్యాఖ్యలు చేశారు.

ప్రపంచంలోనే అతిపెద్ద ప్రజాస్వామ్య దేశమైన భారతదేశంలో ఇటువంటి ఘటనలు తీవ్ర ఆందోళన కలిగిస్తున్నాయని, ప్రజాస్వామ్యవాదులు, రాజ్యాంగవాదులు ఈ అంశంపై గట్టిగా స్పందించాలని మహేష్ కుమార్ గౌడ్ పిలుపునిచ్చారు.

బీజేపీ చేపడుతున్న రాజకీయ కుట్రలను ప్రజలు గమనిస్తున్నారని పేర్కొన్న ఆయన, ఈ వ్యవహారంపై కాంగ్రెస్ పార్టీ న్యాయపరమైన పోరాటం కొనసాగిస్తుందని స్పష్టం చేశారు. ప్రజాస్వామ్య పరిరక్షణ కోసం అన్ని రాజ్యాంగబద్ధ మార్గాల్లో పోరాడతామని తెలిపారు.