ఏసీబీ వలలో మండల సర్వేయర్.. రూ.25 వేల లంచం డిమాండ్ కేసులో ముగ్గురు అరెస్ట్

కరీంనగర్ జిల్లా సైదాపూర్ మండల సర్వేయర్ ఎక్కలదేవి కుమారస్వామి, ఆయనకు ప్రైవేట్ అసిస్టెంట్లుగా వ్యవహరిస్తున్న తీగల రాజేష్, వంగా విహిత్ రెడ్డిలను అవినీతి నిరోధక శాఖ (ఏసీబీ) అధికారులు శుక్రవారం రెడ్‌హ్యాండెడ్‌గా పట్టుకున్నారు.

ఏసీబీ వెల్లడించిన వివరాల ప్రకారం, అమ్మంగుర్తి గ్రామానికి చెందిన ఫిర్యాదుదారుడి భూమికి సర్వే నిర్వహించి అధికారిక అనుకూలత కల్పించేందుకు మండల సర్వేయర్ కుమారస్వామి రూ.25,000 లంచం డిమాండ్ చేశారు. ఈ క్రమంలో 2026 మే 23న రూ.5,000ను యూపీఐ ద్వారా స్వీకరించినట్లు అధికారులు గుర్తించారు.

అనంతరం జూన్ 2న మరో రూ.10,000ను నగదు రూపంలో తన ప్రైవేట్ అసిస్టెంట్ వంగా విహిత్ రెడ్డి ద్వారా తీసుకున్నాడు. మిగిలిన రూ.10,000 లంచం మొత్తాన్ని జూన్ 5న మరో ప్రైవేట్ అసిస్టెంట్ తీగల రాజేష్ ద్వారా స్వీకరిస్తున్న సమయంలో ఏసీబీ కరీంనగర్ రేంజ్ అధికారులు ఉచ్చుపన్ని పట్టుకున్నారు.

తీగల రాజేష్ వద్ద నుంచి రూ.10,000 లంచం నగదును ఏసీబీ అధికారులు స్వాధీనం చేసుకున్నారు. అధికారిక విధులను నిర్వర్తించేందుకు లంచం డిమాండ్ చేసి స్వీకరించడం ద్వారా ప్రభుత్వ ఉద్యోగి తన విధులను అక్రమంగా, అవినీతిపరంగా నిర్వహించినట్లు ఏసీబీ పేర్కొంది.

ఈ కేసులో ప్రధాన నిందితుడు మండల సర్వేయర్ ఎక్కలదేవి కుమారస్వామితో పాటు తీగల రాజేష్, వంగా విహిత్ రెడ్డిలను అరెస్ట్ చేసి కరీంనగర్‌లోని ఏసీబీ ప్రత్యేక న్యాయస్థానం ఎదుట హాజరుపరచనున్నట్లు అధికారులు తెలిపారు. కేసు దర్యాప్తు కొనసాగుతోంది. భద్రతా కారణాల దృష్ట్యా ఫిర్యాదుదారుడి వివరాలను గోప్యంగా ఉంచినట్లు ఏసీబీ వెల్లడించింది.

లంచం డిమాండ్ చేస్తే 1064కు ఫిర్యాదు చేయండి

ప్రభుత్వ ఉద్యోగులు ఎవరైనా లంచం డిమాండ్ చేసినట్లయితే ప్రజలు ఏసీబీ టోల్‌ఫ్రీ నంబర్ 1064కు ఫిర్యాదు చేయాలని అధికారులు సూచించారు. అలాగే వాట్సాప్‌ 9440446106, ఫేస్‌బుక్‌లో Telangana ACB, ఎక్స్ (ట్విటర్)లో @TelanganaACB ద్వారా కూడా ఫిర్యాదులు స్వీకరిస్తామని తెలిపారు. ఫిర్యాదుదారుల పేరు, వివరాలను పూర్తిగా గోప్యంగా ఉంచుతామని ఏసీబీ స్పష్టం చేసింది.