ముంబైని ముంచెత్తిన కుండపోత వర్షాలు.. హై అలర్ట్ ప్రకటించిన బీఎంసీ

 

ముంబైని ముంచెత్తిన కుండపోత వర్షాలు.. హై అలర్ట్ ప్రకటించిన బీఎంసీ

మహారాష్ట్ర రాజధాని ముంబైలో గత మూడు రోజులుగా ఎడతెరిపి లేకుండా కురుస్తున్న భారీ వర్షాలు నగరాన్ని అతలాకుతలం చేస్తున్నాయి. రికార్డు స్థాయిలో వర్షపాతం నమోదవడంతో పలు ప్రాంతాలు జలమయమయ్యాయి. లోతట్టు ప్రాంతాలు నీటమునిగిపోవడంతో ప్రజలు తీవ్ర ఇబ్బందులు ఎదుర్కొంటున్నారు.

ముఖ్యంగా తూర్పు శివారు ప్రాంతాల్లో గత 48 గంటల్లో ఏకంగా 380 మిల్లీమీటర్ల వర్షపాతం నమోదైంది. నగర పరిధిలో 300 మిల్లీమీటర్లు, పశ్చిమ శివార్లలో 345 మిల్లీమీటర్ల మేర వర్షం కురిసింది. మరోవైపు గంటకు 70 నుంచి 80 కిలోమీటర్ల వేగంతో ఈదురు గాలులు వీయడంతో పరిస్థితి మరింత క్లిష్టంగా మారింది.

భారత వాతావరణ శాఖ (IMD) గతంలో జూలై 4 నుంచి 6 వరకు జారీ చేసిన రెడ్ అలర్ట్ను మంగళవారం ఆరెంజ్ అలర్ట్గా మార్చినా, నగరంలో ఇంకా భారీ నుంచి అతి భారీ వర్షాలు కురిసే అవకాశం ఉందని హెచ్చరించింది.

పరిస్థితిని దృష్టిలో ఉంచుకుని బృహన్ ముంబై మున్సిపల్ కార్పొరేషన్ (బీఎంసీ) హై అలర్ట్ ప్రకటించింది. విపత్తు నిర్వహణ బృందాలు లోతట్టు ప్రాంతాల్లో సహాయక చర్యలు చేపట్టి, హై-కెపాసిటీ పంపుల ద్వారా వరద నీటిని తొలగిస్తున్నాయి. బీఎంసీ కమిషనర్ అశ్విని భిడే కంట్రోల్ రూమ్ నుంచి పరిస్థితిని నిరంతరం పర్యవేక్షిస్తున్నారు.

విద్యార్థుల భద్రత దృష్ట్యా ప్రభుత్వ, ప్రైవేట్ పాఠశాలలు, విద్యాసంస్థలకు అధికారులు ముందస్తుగా సెలవులు ప్రకటించారు. ప్రజలు అత్యవసరమైతే తప్ప బయటకు రావద్దని, అధికారుల సూచనలు తప్పనిసరిగా పాటించాలని అధికారులు విజ్ఞప్తి చేశారు.