నాంపల్లి క్రిమినల్ కోర్టులో అగ్నిప్రమాదం.. షార్ట్‌సర్క్యూట్ కారణమా?

 

నాంపల్లి క్రిమినల్ కోర్టులో అగ్నిప్రమాదం.. షార్ట్‌సర్క్యూట్ కారణమా?

హైదరాబాద్‌లోని నాంపల్లి క్రిమినల్ కోర్టు భవనంలో సోమవారం (జూలై 6) తెల్లవారుజామున అగ్నిప్రమాదం చోటుచేసుకుంది. కోర్టు భవనం మూడో అంతస్తులో ఒక్కసారిగా మంటలు చెలరేగడంతో అక్కడి సిబ్బంది అప్రమత్తమై వెంటనే అగ్నిమాపక శాఖకు సమాచారం అందించారు.

సమాచారం అందుకున్న అగ్నిమాపక సిబ్బంది రెండు ఫైరింజన్లతో ఘటనాస్థలికి చేరుకుని మంటలను అదుపులోకి తీసుకువచ్చారు. అధికారులు వేగంగా స్పందించడంతో మంటలు ఇతర అంతస్తులకు వ్యాపించకుండా అడ్డుకోగలిగారు. దీంతో పెను ప్రమాదం తప్పిందని అధికారులు తెలిపారు.

ప్రాథమిక సమాచారం ప్రకారం షార్ట్‌సర్క్యూట్ కారణంగానే ఈ అగ్నిప్రమాదం సంభవించి ఉండొచ్చని అధికారులు అనుమానిస్తున్నారు. ఘటనలో ఎలాంటి ప్రాణనష్టం జరగలేదని, పరిస్థితి ప్రస్తుతం పూర్తిగా అదుపులో ఉందని వెల్లడించారు.

ఈ ఘటనలో జరిగిన ఆస్తి నష్టం ఎంత మేరకు ఉందనే విషయంపై అధికారులు అంచనా వేస్తుండగా, ప్రమాదానికి గల ఖచ్చితమైన కారణాలను తెలుసుకునేందుకు పోలీసులు కేసు నమోదు చేసి దర్యాప్తు చేపట్టారు.