ఎమ్మెల్యే కూతురినే పెళ్లాడిన ‘నిత్య పెళ్లికొడుకు’.. 25 పెళ్లిళ్లు చేశాడని ఆరోపణ

 

ఎమ్మెల్యే కూతురినే పెళ్లాడిన ‘నిత్య పెళ్లికొడుకు’.. 25 పెళ్లిళ్లు చేశాడని ఆరోపణ

లక్నో: పెళ్లి పేరుతో పలువురు మహిళలను మోసం చేశాడని ఆరోపణలు ఎదుర్కొంటున్న ఓ వ్యక్తి వ్యవహారం ఉత్తరప్రదేశ్‌లో సంచలనంగా మారింది. ఏకంగా ఓ ఎమ్మెల్యే కుమార్తెను కూడా పెళ్లి చేసుకున్న అతడికి ఇప్పటికే సుమారు 25 మంది మహిళలతో వివాహాలు జరిగినట్లు ఆరోపణలు రావడం కలకలం రేపుతోంది. రెండున్నరేళ్ల తర్వాత అల్లుడి అసలు వ్యవహారం బయటపడటంతో ఎమ్మెల్యే పోలీసులను ఆశ్రయించారు.

ఉత్తరప్రదేశ్‌కు చెందిన బీజేపీ ఎమ్మెల్యే జ్ఞాన్ తివారీ పోలీసులకు ఇచ్చిన ఫిర్యాదు ప్రకారం.. మిశ్రిఖ్‌లోని చంద్రావల్‌కు చెందిన అనూజ్ త్రివేది కుమారుడు ప్రఖర్ త్రివేదితో తన కుమార్తె ప్రగ్యాకు 2024లో వివాహం జరిగింది. వివాహ సమయంలో ప్రఖర్ కుటుంబం తమను తాము సంపన్నులుగా, ముఖ్యంగా ముంబైకి చెందిన ప్రముఖ రియల్ ఎస్టేట్ వ్యాపార కుటుంబంగా పరిచయం చేసుకున్నట్లు ఎమ్మెల్యే ఆరోపించారు.

అంతేకాకుండా ప్రఖర్‌కు సంబంధించిన గత చరిత్ర, క్రిమినల్ కేసులు తదితర వివరాలను కుటుంబ సభ్యుల నుంచి దాచిపెట్టారని ఫిర్యాదులో పేర్కొన్నారు. పెళ్లి సమయంలో అతడిని ఎలిజిబుల్ బ్యాచిలర్‌గా నమ్మించి తమ కుమార్తెకు వివాహం జరిపించినట్లు తెలిపారు.

అయితే పెళ్లయిన సుమారు రెండున్నరేళ్ల తర్వాత ప్రఖర్ త్రివేది గురించి సోషల్ మీడియా, ఇతర మార్గాల ద్వారా తమ కుటుంబానికి షాకింగ్ విషయాలు తెలిసినట్లు ఎమ్మెల్యే వెల్లడించారు. అతడు మహారాష్ట్రతో పాటు ఇతర రాష్ట్రాల్లోనూ నకిలీ గుర్తింపులతో మహిళలకు పరిచయం ఏర్పరుచుకుని, వారిని పెళ్లి పేరుతో మోసం చేసినట్లు ఆరోపణలు వెలువడ్డాయని తెలిపారు.

ఈ క్రమంలో ప్రఖర్ ఇప్పటికే దాదాపు 25 మంది మహిళలను వివాహం చేసుకున్నట్లు తమకు సమాచారం అందిందని ఎమ్మెల్యే తన ఫిర్యాదులో పేర్కొన్నారు. వివిధ మహిళలను మోసం చేసి వారి నుంచి కోట్లాది రూపాయలు వసూలు చేసినట్లు కూడా ఆరోపించారు.

అల్లుడి వ్యవహారం వెలుగులోకి వచ్చిన తర్వాత తన కుమార్తెను ఇంటికి తీసుకొచ్చినట్లు ఎమ్మెల్యే తెలిపారు. అనంతరం పోలీసులను ఆశ్రయించి ప్రఖర్ త్రివేది, అతడి తండ్రి అనూజ్ త్రివేదిపై ఫిర్యాదు చేశారు.

ఫిర్యాదు ఆధారంగా కేసు నమోదు చేసిన పోలీసులు అనూజ్ త్రివేది, ప్రఖర్ త్రివేది ఇద్దరినీ అరెస్టు చేశారు. ఈ వ్యవహారంలో ఇంకా ఎంతమంది మహిళలు బాధితులుగా ఉన్నారు? వివాహాల పేరుతో ఎంతమేర ఆర్థిక మోసం జరిగింది? నిందితులు ఏయే నకిలీ గుర్తింపులను ఉపయోగించారు? అనే అంశాలపై పోలీసులు దర్యాప్తు చేస్తున్నట్లు సమాచారం.

ఎమ్మెల్యే కుటుంబాన్నే మోసం చేసినట్లు ఆరోపణలు రావడం, నిందితుడికి ఇప్పటికే సుమారు 25 వివాహాలు జరిగినట్లు ఫిర్యాదులో పేర్కొనడం ఈ కేసును దేశవ్యాప్తంగా చర్చనీయాంశంగా మార్చింది. అయితే ఈ ఆరోపణలు దర్యాప్తులో, న్యాయస్థానంలో నిర్ధారణ కావాల్సి ఉంది.