రూ.5 వేల లంచం తీసుకుంటూ ఏసీబీ వలలో గ్రామ పాలన అధికారి

జగిత్యాల, ఆగస్టు 6: జగిత్యాల జిల్లా మెట్‌పల్లి మండలం ఆత్మకూర్ గ్రామానికి చెందిన గ్రామ పాలన అధికారి (GPO) మాతే రాజేష్ అవినీతి నిరోధక శాఖ (ఏసీబీ) అధికారులకు రెడ్‌హ్యాండెడ్‌గా చిక్కాడు. ఫిర్యాదుదారుడి నుంచి రూ.5,000 లంచం డిమాండ్ చేసి స్వీకరిస్తుండగా కరీంనగర్ ఏసీబీ యూనిట్ అధికారులు గురువారం పట్టుకున్నారు.

ఏసీబీ తెలిపిన వివరాల ప్రకారం.. ఫిర్యాదుదారుడి పట్టా పాస్‌బుక్‌లో పేరు సవరణకు సంబంధించి గ్రామ పాలన అధికారి సిద్ధం చేసిన విచారణ నివేదికను ఉన్నత రెవెన్యూ అధికారులకు పంపేందుకు అధికారిక అనుకూలత కల్పించే పేరుతో రాజేష్ రూ.5 వేల లంచం కోరాడు.

అధికారుల సూచన మేరకు ఫిర్యాదుదారుడు లంచం మొత్తాన్ని గ్రామ పాలన అధికారి హ్యాండ్‌బ్యాగ్‌లో ఉంచగా, ఏసీబీ అధికారులు దాడి నిర్వహించి అతడిని అదుపులోకి తీసుకున్నారు. అనంతరం నిర్వహించిన రసాయన పరీక్షలో హ్యాండ్‌బ్యాగ్‌కు పాజిటివ్ ఫలితం రావడంతో లంచం స్వీకరించినట్లు నిర్ధారణ అయింది. బ్యాగ్‌లో నుంచి రూ.5 వేల లంచం నగదును అధికారులు స్వాధీనం చేసుకున్నారు.

అధికారిక హోదాను దుర్వినియోగం చేసి అక్రమంగా లంచం తీసుకున్నందుకు గ్రామ పాలన అధికారిని అరెస్ట్ చేసిన ఏసీబీ అధికారులు, అనంతరం కరీంనగర్‌లోని ప్రత్యేక ఏసీబీ కోర్టులో హాజరుపరచనున్నట్లు తెలిపారు. ఈ కేసులో దర్యాప్తు కొనసాగుతోంది. భద్రతా కారణాల దృష్ట్యా ఫిర్యాదుదారుడి వివరాలను గోప్యంగా ఉంచారు.

లంచం డిమాండ్ చేస్తే 1064కు ఫిర్యాదు చేయండి

ప్రభుత్వ ఉద్యోగులు ఎవరైనా లంచం డిమాండ్ చేసినట్లయితే ప్రజలు ఏసీబీ టోల్‌ఫ్రీ నంబర్ 1064కు ఫిర్యాదు చేయాలని అధికారులు సూచించారు. అలాగే WhatsApp: 9440446106 ద్వారా లేదా తెలంగాణ ఏసీబీ అధికారిక సోషల్ మీడియా వేదికల ద్వారా కూడా ఫిర్యాదులు చేయవచ్చని తెలిపారు. ఫిర్యాదుదారుల వివరాలు పూర్తిగా గోప్యంగా ఉంచుతామని ఏసీబీ స్పష్టం చేసింది.