రూ.2.50 లక్షల లంచం డిమాండ్.. రూ.లక్ష తీసుకుంటూ ఇద్దరు అధికారులు, ఓ ప్రైవేట్ వ్యక్తిని ఏసీబీ పట్టివేత

రూ.2.50 లక్షల లంచం డిమాండ్.. రూ.లక్ష తీసుకుంటూ ఇద్దరు అధికారులు, ఓ ప్రైవేట్ వ్యక్తిని ఏసీబీ పట్టివేత

చేవెళ్ల, సెప్టెంబర్ 17: రంగారెడ్డి జిల్లా చేవెళ్ల డివిజనల్ సబ్‌ ట్రెజరీ కార్యాలయంలో లంచం తీసుకుంటూ ఇద్దరు ట్రెజరీ అధికారులు, ఓ ప్రైవేట్ వ్యక్తి ఏసీబీకి రెడ్‌హ్యాండెడ్‌గా పట్టుబడ్డారు. సస్పెన్షన్ కాలానికి సంబంధించిన జీతాల బిల్లులు, పదవీ విరమణ అనంతర పెన్షన్ సర్దుబాటు బకాయిలను ప్రాసెస్ చేసి పంపినందుకు ప్రతిఫలంగా రూ.2.50 లక్షల లంచాన్ని అధికారులు డిమాండ్ చేసినట్లు ఏసీబీ వెల్లడించింది.

ఏసీబీ రంగారెడ్డి రేంజ్ యూనిట్ తెలిపిన వివరాల ప్రకారం.. చేవెళ్ల డివిజనల్ సబ్‌ ట్రెజరీ కార్యాలయంలో సబ్‌ ట్రెజరీ అధికారి మడిగ లక్ష్మయ్య (AO-1), అసిస్టెంట్ ట్రెజరీ అధికారి కావలి అనురాధ (AO-2) విధులు నిర్వహిస్తున్నారు. ఫిర్యాదుదారుడి సస్పెన్షన్ కాలానికి సంబంధించిన రూ.23,25,390 విలువైన జీతాల బిల్లులు, అలాగే రూ.4,29,000 పోస్టు రిటైర్మెంట్ పెన్షన్ అడ్జస్ట్‌మెంట్ బకాయిలను ప్రాసెస్ చేసి ఫార్వర్డ్ చేసినందుకు ప్రతిఫలంగా ఇద్దరు అధికారులు రూ.2.50 లక్షల లంచాన్ని డిమాండ్ చేసినట్లు ఏసీబీ పేర్కొంది.

అందులో భాగంగా మొదటి విడతగా రూ.1 లక్ష చెల్లించేందుకు ఫిర్యాదుదారుడు అంగీకరించాడు. ఈ మేరకు సెప్టెంబర్ 17న ఏసీబీ అధికారులు వల పన్నారు.

లంచం మొత్తంలో రూ.50,000ను సబ్‌ ట్రెజరీ అధికారి మడిగ లక్ష్మయ్య తన వాటాగా ఫిర్యాదుదారుడి నుంచి స్వీకరించినట్లు ఏసీబీ తెలిపింది. మరో రూ.50,000ను అసిస్టెంట్ ట్రెజరీ అధికారి కావలి అనురాధ సూచనల మేరకు ప్రైవేట్ వ్యక్తి వడ్డె జంగయ్య అలియాస్ చిన్నా (A-3) స్వీకరించినట్లు వెల్లడించింది.

లంచం తీసుకున్న సమయంలో ఏసీబీ అధికారులు దాడి చేసి నిందితులను రెడ్‌హ్యాండెడ్‌గా పట్టుకున్నారు. వారి వద్ద నుంచి ఫిర్యాదుదారుడు ఇచ్చిన రూ.1,00,000ల లంచం మొత్తాన్ని స్వాధీనం చేసుకున్నారు. అధికారులు తమ విధులను సక్రమంగా నిర్వర్తించకుండా అక్రమ ప్రయోజనం పొందేందుకు ప్రయత్నించినట్లు ఏసీబీ పేర్కొంది.

ఈ కేసులో AO-1 మడిగ లక్ష్మయ్య, AO-2 కావలి అనురాధ, A-3 వడ్డె జంగయ్య అలియాస్ చిన్నాలను నాంపల్లిలోని SPE & ACB కేసుల ప్రధాన ప్రత్యేక న్యాయస్థానం ఎదుట హాజరుపరిచి జ్యుడీషియల్ రిమాండ్‌కు తరలించనున్నట్లు ఏసీబీ తెలిపింది. కేసు ప్రస్తుతం దర్యాప్తులో ఉంది. ఫిర్యాదుదారుడి భద్రతను దృష్టిలో ఉంచుకుని ఆయన వివరాలను ఏసీబీ అధికారులు వెల్లడించలేదు.

లంచం డిమాండ్ చేస్తే 1064కు ఫిర్యాదు చేయండి

ఏదైనా ప్రభుత్వ ఉద్యోగి లంచం డిమాండ్ చేస్తే ప్రజలు ఏసీబీ టోల్‌ఫ్రీ నంబర్ 1064కు ఫిర్యాదు చేయాలని తెలంగాణ ఏసీబీ సూచించింది. అలాగే వాట్సాప్ ద్వారా 9440446106 నంబర్‌కు సమాచారం అందించవచ్చని తెలిపింది. తెలంగాణ ఏసీబీ సోషల్ మీడియా వేదికల ద్వారా కూడా ఫిర్యాదులు స్వీకరిస్తున్నట్లు పేర్కొంది. ఫిర్యాదుదారు లేదా బాధితుడి పేరు, వివరాలను గోప్యంగా ఉంచుతామని ఏసీబీ స్పష్టం చేసింది.