యూఏఈ రాజకుటుంబంలో విషాదం.. షేక్ అహ్మద్ బిన్ రషీద్ అల్ మక్తూమ్ కన్నుమూత

దుబాయ్‌లో 10 రోజుల అధికారిక సంతాప దినాలు

దుబాయ్: యునైటెడ్ అరబ్ ఎమిరేట్స్ (యూఏఈ) రాజకుటుంబంలో తీవ్ర విషాదం నెలకొంది. యూఏఈ ఉపాధ్యక్షుడు, ప్రధానమంత్రి, దుబాయ్ పాలకుడు షేక్ మహమ్మద్ బిన్ రషీద్ అల్ మక్తూమ్ సోదరుడు షేక్ అహ్మద్ బిన్ రషీద్ అల్ మక్తూమ్ (76) సోమవారం కన్నుమూశారు. ఆయన మృతిని దుబాయ్ పాలకుల కోర్టు అధికారికంగా ప్రకటించింది. దీంతో యూఏఈ వ్యాప్తంగా విషాద ఛాయలు అలుముకున్నాయి.

10 రోజుల అధికారిక సంతాపం

షేక్ అహ్మద్ బిన్ రషీద్ అల్ మక్తూమ్ మృతికి గౌరవ సూచకంగా దుబాయ్ ప్రభుత్వం 10 రోజుల అధికారిక సంతాప దినాలను ప్రకటించింది. ఈ కాలంలో దుబాయ్‌లోని ప్రభుత్వ కార్యాలయాలు, అధికారిక భవనాలతో పాటు ఎమిరేట్ వ్యాప్తంగా జాతీయ పతాకాలను సగం వరకు అవనతం చేయనున్నారు.

సోదరుడి మరణంపై దుబాయ్ పాలకుడు షేక్ మహమ్మద్ బిన్ రషీద్ అల్ మక్తూమ్ తీవ్ర విచారం వ్యక్తం చేశారు. షేక్ అహ్మద్ భౌతికంగా తమ మధ్య లేకపోయినా, ఆయన అందించిన సేవలు, జ్ఞాపకాలు ఎప్పటికీ తమ ప్రార్థనలు, హృదయాల్లో నిలిచిపోతాయని పేర్కొన్నారు.

దుబాయ్ అభివృద్ధిలో కీలక సేవలు

దివంగత దుబాయ్ పాలకుడు షేక్ రషీద్ బిన్ సయీద్ అల్ మక్తూమ్ కుమారుడైన షేక్ అహ్మద్ బిన్ రషీద్ అల్ మక్తూమ్ ప్రజా జీవితం, పరిపాలన, భద్రత, సైనిక వ్యవహారాలు, వ్యాపారం, క్రీడా రంగాల్లో సుదీర్ఘకాలం సేవలందించారు.

యునైటెడ్ కింగ్‌డమ్‌లోని ప్రతిష్ఠాత్మక రాయల్ మిలిటరీ అకాడమీ శాండ్‌హర్స్ట్లో విద్యాభ్యాసం పూర్తి చేసిన ఆయన స్వదేశానికి తిరిగి వచ్చి దుబాయ్ సైనిక విభాగంలో సేవలందించారు. అనంతరం దుబాయ్ పోలీస్, పబ్లిక్ సెక్యూరిటీ విభాగాల్లో కీలక బాధ్యతలు నిర్వహించారు. నగర భద్రతా వ్యవస్థను బలోపేతం చేయడంలో ఆయన కీలక పాత్ర పోషించారు.

క్రీడలు, వ్యాపార రంగాల్లోనూ ముద్ర

షేక్ అహ్మద్‌కు క్రీడలపై ప్రత్యేక ఆసక్తి ఉండేది. ముఖ్యంగా గుర్రపు పందేల అభివృద్ధికి ఆయన విశేష కృషి చేశారు. దుబాయ్‌లోని జెబెల్ అలీ రేస్‌కోర్స్ రూపకల్పనతో పాటు అల్ వసల్ స్పోర్ట్స్ క్లబ్ అభివృద్ధిలోనూ ఆయన పాత్ర ఉంది.

పాలనా బాధ్యతలతో పాటు రియల్ ఎస్టేట్, హాస్పిటాలిటీ తదితర వ్యాపార రంగాల్లోనూ ఆయన కార్యకలాపాలు కొనసాగించారు. దుబాయ్ ఆర్థిక, సామాజిక అభివృద్ధిలో ఆయన చేసిన సేవలను పలువురు గుర్తుచేసుకుంటున్నారు.

ప్రముఖుల సంతాపం

షేక్ అహ్మద్ బిన్ రషీద్ అల్ మక్తూమ్ మృతిపై యూఏఈ అధ్యక్ష భవనం, పలువురు ప్రముఖులు, దౌత్యవేత్తలు, ఎమిరేట్స్ ప్రజలు సంతాపం వ్యక్తం చేశారు. అల్ మక్తూమ్ రాజకుటుంబానికి, దుబాయ్ ప్రజలకు సానుభూతి తెలిపారు. ఆయన ఆత్మకు శాంతి చేకూరాలని కోరుతూ ప్రత్యేక ప్రార్థనలు నిర్వహిస్తున్నారు.