నటి రకుల్ ప్రీత్ సింగ్‌కు సంబంధించిన ప్రాంతాల్లో ఐటీ సోదాలు.. 12 చోట్ల తనిఖీలు

 నటి రకుల్ ప్రీత్ సింగ్‌కు సంబంధించిన ప్రాంతాల్లో ఐటీ సోదాలు.. 12 చోట్ల తనిఖీలు

ముంబై: బాలీవుడ్ నటి రకుల్ ప్రీత్ సింగ్, ఆమె భర్త జాకీ భగ్నాని కుటుంబానికి చెందిన ప్రాంతాలతో పాటు సినీ నిర్మాణ సంస్థలకు సంబంధించిన 12 ప్రాంతాల్లో ఆదాయపు పన్ను శాఖ అధికారులు సోమవారం సోదాలు నిర్వహించారు. ముంబైలో చేపట్టిన ఈ తనిఖీలు అనుమానాస్పద ఆర్థిక లావాదేవీలపై జరుగుతున్న దర్యాప్తులో భాగంగా ఉన్నట్లు పలు నివేదికలు వెల్లడించాయి. 

సినిమా నిర్మాణం, ఫైనాన్సింగ్‌కు సంబంధించిన వ్యవహారాల్లో నిధులను విదేశాలకు తరలించినట్లు వచ్చిన అనుమానాలపై అధికారులు దృష్టి సారించినట్లు సమాచారం. సినిమా ప్రాజెక్టులకు నిధులు సమకూర్చే పేరుతో జరిగినట్లు అనుమానిస్తున్న విదేశీ లావాదేవీలకు సంబంధించిన పత్రాలు, ఆర్థిక రికార్డులు, ఇతర లావాదేవీల వివరాలను ఐటీ శాఖ బృందాలు పరిశీలిస్తున్నట్లు తెలుస్తోంది. 

వాషు భగ్నాని, పనోరమా స్టూడియోస్‌ ప్రాంతాల్లోనూ..

ఈ సోదాలు రకుల్ ప్రీత్ సింగ్‌కు సంబంధించిన ప్రాంతాలతో పాటు ఆమె భర్త జాకీ భగ్నాని తండ్రి, ప్రముఖ నిర్మాత వాషు భగ్నానితో సంబంధం ఉన్న ప్రాంతాల్లోనూ కొనసాగుతున్నట్లు నివేదికలు పేర్కొన్నాయి. అలాగే పనోరమా స్టూడియోస్‌కు సంబంధించిన ప్రాంగణాల్లోనూ అధికారులు తనిఖీలు చేపట్టినట్లు సమాచారం.

అయితే సోదాలు కొనసాగుతున్న దశలోనే ఉన్నందున, నిధుల అక్రమ లావాదేవీలు లేదా పన్ను ఎగవేతకు సంబంధించి తుది నిర్ధారణ ఏదీ ఇప్పటివరకు వెలువడలేదు. దర్యాప్తు పూర్తయిన తర్వాతే ఆర్థిక లావాదేవీలపై స్పష్టత వచ్చే అవకాశం ఉంది. 

గతంలో రకుల్ సోదరుడి పేరు డ్రగ్స్ కేసులో..

ఇదిలా ఉండగా, రకుల్ ప్రీత్ సింగ్ సోదరుడు అమన్ ప్రీత్ సింగ్ పేరు 2025 డిసెంబర్‌లో హైదరాబాద్‌లో వెలుగులోకి వచ్చిన డ్రగ్స్ కేసులో ప్రస్తావనకు వచ్చింది. డిసెంబర్ 19న EAGLE ఫోర్స్, వెస్ట్‌జోన్ పోలీసులు నిర్వహించిన ఆపరేషన్‌లో ఇద్దరు వ్యక్తులను అరెస్టు చేసి వారి వద్ద నుంచి 43.7 గ్రాముల కొకైన్, 11.5 గ్రాముల ఎండీఎంఏ స్వాధీనం చేసుకున్నట్లు పోలీసులు తెలిపారు. 

అరెస్టైన వ్యక్తుల విచారణలో అమన్ ప్రీత్ సింగ్ సహా కొంతమంది డ్రగ్స్ వినియోగదారుల పేర్లు బయటకు వచ్చినట్లు అప్పట్లో పోలీసులు వెల్లడించారు. అమన్ ఐదుసార్లు డ్రగ్స్ కొనుగోలు చేసినట్లు అనుమానం వ్యక్తమైనప్పటికీ, ఆ సమయంలో ఆయనపై ఆరోపణలకు సంబంధించిన వివరాలను పోలీసులు దర్యాప్తు నేపథ్యంలోనే వెల్లడించారు.

ప్రస్తుతం జరుగుతున్న ఆదాయపు పన్ను శాఖ సోదాలు మాత్రం డ్రగ్స్ కేసుకు వేరు. ప్రస్తుత దర్యాప్తు ప్రధానంగా సినీ నిర్మాణం, నిధుల లావాదేవీలు, విదేశీ నిధుల బదిలీలకు సంబంధించిన అనుమానాలపైనే కొనసాగుతున్నట్లు అందుబాటులో ఉన్న తాజా నివేదికలు సూచిస్తున్నాయి.