తెలంగాణ విలీన దినోత్సవం.. తెలంగాణ రక్షణ సేన కార్యాలయంలో జాతీయ జెండా ఆవిష్కరణ

 

తెలంగాణ విలీన దినోత్సవం.. తెలంగాణ రక్షణ సేన కార్యాలయంలో జాతీయ జెండా ఆవిష్కరణ

అరాచక శక్తులను గద్దె దించేందుకు ప్రజలంతా పోరాడాలి: కల్వకుంట్ల కవిత

హైదరాబాద్‌: తెలంగాణ విలీన దినోత్సవం సందర్భంగా తెలంగాణ రక్షణ సేన కార్యాలయంలో పార్టీ చీఫ్‌ కల్వకుంట్ల కవిత జాతీయ జెండాను ఎగురవేశారు. ఈ సందర్భంగా తెలంగాణ చరిత్ర, సెప్టెంబర్‌ 17నాటి పోరాటాలపై ఆమె మాట్లాడారు. తెలంగాణ పౌరుషానికి, పోరాట పటిమకు, త్యాగాల చరిత్రకు సెప్టెంబర్‌ 17 నిదర్శనమని పేర్కొన్నారు.

సెప్టెంబర్‌ 17కు సంబంధించి కాంగ్రెస్‌, బీజేపీలు వేర్వేరు రాజకీయ కథనాలను ప్రచారం చేస్తూ వాస్తవాలను వక్రీకరిస్తున్నాయని కవిత ఆరోపించారు. కాంగ్రెస్‌ నేతలు తమ పార్టీ ఆధ్వర్యంలోనే పోరాటం జరిగిందని చెబుతున్నారని, మరోవైపు బీజేపీ దీనిని కేవలం ముస్లిం పాలకుడిపై హిందువులు చేసిన పోరాటంగా చిత్రీకరించే ప్రయత్నం చేస్తోందని ఆమె విమర్శించారు. అయితే ఆనాటి పోరాటంలో అన్ని వర్గాల ప్రజలు భాగస్వాములయ్యారని తెలిపారు.

ప్రజల్లో చైతన్యం తీసుకొచ్చిన మహనీయులు

తెలంగాణ ప్రజలను తమకు జరుగుతున్న అన్యాయాలపై పోరాడేలా అనేక మంది మేధావులు, రచయితలు, కవులు, ప్రజా ఉద్యమకారులు చైతన్యపరిచారని కవిత పేర్కొన్నారు. వట్టికోట ఆళ్వార్‌ స్వామి, సురవరం ప్రతాపరెడ్డి, రావి నారాయణరెడ్డి వంటి మహనీయులు ప్రజల్లో చైతన్యం తీసుకురావడానికి కృషి చేశారని అన్నారు.

ఆ రోజుల్లో రవాణా, సమాచార సౌకర్యాలు అంతగా లేకపోయినా సైకిళ్లపై గ్రామాల్లో తిరుగుతూ ప్రజలను సంఘటితం చేశారని చెప్పారు. ఆంధ్ర మహాసభల ద్వారా ప్రజలను ఒక వేదికపైకి తీసుకువచ్చారని పేర్కొన్నారు. కాళోజీ, దాశరథి వంటి కవులు, షోయాబుల్లా ఖాన్‌, మగ్దూం మొహియుద్దీన్‌ వంటి మహనీయులు కూడా ప్రజల్లో చైతన్యం నింపారని తెలిపారు.

అన్ని వర్గాల ప్రజల భాగస్వామ్యం

ఆనాటి జాగీర్దార్లు, జమీందార్ల దాష్టీకాలకు వ్యతిరేకంగా జరిగిన పోరాటాల్లో హిందువులు, ముస్లింలు సహా వివిధ వర్గాల ప్రజలు పాల్గొన్నారని కవిత అన్నారు. దొడ్డి కొమురయ్య, చాకలి ఐలమ్మ, షేక్‌ బందగీ వంటి వారి పోరాటాలు ప్రజా ఉద్యమాలకు స్ఫూర్తిగా నిలిచాయని పేర్కొన్నారు.

ప్రజలను సంఘటితం చేయడంలో మల్లు స్వరాజ్యం, అరుట్ల కమలాదేవి, సురవరం ప్రతాపరెడ్డి వంటి వారి పాత్ర కీలకమైందని ఆమె అన్నారు. ఆనాటి దాష్టీకాలకు వ్యతిరేకంగా ప్రజలే దండు కట్టి తమను తాము కాపాడుకున్నారని తెలిపారు.

కాంగ్రెస్‌, బీజేపీ కథనాలపై విమర్శలు

సెప్టెంబర్‌ 17 పోరాట చరిత్రను రాజకీయ ప్రయోజనాల కోసం వక్రీకరించవద్దని కవిత అన్నారు. సంస్థానాల్లో పోరాటం చేయడం కాంగ్రెస్‌ విధానం కాదని మహాత్మా గాంధీ పేర్కొన్నారని ఆమె ప్రస్తావించారు. నిజాం పాలనలో భూముల పంపిణీకి సంబంధించిన అంశాలను కూడా ఆమె ప్రస్తావిస్తూ, అనంతరం జరిగిన పరిణామాల్లో పేదలకు నష్టం జరిగిందని ఆరోపించారు.

ఆనాటి పోరాట సమయంలో ప్రస్తుత రూపంలో బీజేపీ, ఆర్‌ఎస్‌ఎస్‌ రాజకీయంగా లేవని, తెలంగాణ ప్రజలే తమ హక్కుల కోసం పోరాడారని కవిత పేర్కొన్నారు. అందువల్ల సెప్టెంబర్‌ 17 చరిత్రను ఒక మతానికి లేదా ఒక రాజకీయ పార్టీకి పరిమితం చేయడం సరికాదన్నారు.

ప్రజల హక్కుల కోసం తెలంగాణ రక్షణ సేన

ప్రస్తుత పరిస్థితుల్లోనూ ప్రజల హక్కుల పరిరక్షణ కోసం తెలంగాణ రక్షణ సేన పనిచేస్తుందని కవిత అన్నారు. మతం, కులం, పేద, ధనిక అనే తేడాలు లేకుండా ప్రతి ఒక్కరి హక్కులను కాపాడేందుకు ప్రజలంతా కలిసి పోరాడాలని పిలుపునిచ్చారు.

ఆనాటి పోరాట స్ఫూర్తిని తీసుకుని ప్రస్తుతం ప్రజలకు జరుగుతున్న అన్యాయాలు, అరాచకాలకు వ్యతిరేకంగా ప్రజాస్వామ్య పద్ధతుల్లో పోరాటం చేయాల్సిన అవసరం ఉందని కవిత పేర్కొన్నారు.