హైదరాబాద్‌లో తొమ్మిదేళ్లుగా గంజాయి దందా.. మహిళా పెడ్లర్ అరెస్ట్!

30 కేసుల్లో నిందితురాలు.. 13 కేసుల్లో పరారీ.. రూ.1.59 లక్షల నగదు స్వాధీనం

హైదరాబాద్: తెలంగాణలో మాదకద్రవ్యాల అక్రమ రవాణా, విక్రయాలపై ఈగల్ ఫోర్స్ ప్రత్యేక నిఘా కొనసాగిస్తోంది. ఈ క్రమంలో గత తొమ్మిదేళ్లుగా గంజాయి వ్యాపారం నిర్వహిస్తున్నట్లు ఆరోపణలు ఎదుర్కొంటున్న 51 ఏళ్ల మహిళను పోలీసులు అరెస్ట్ చేశారు. నానక్‌రామ్‌గూడకు చెందిన కలపతి నీతూ బాయిని నవంబర్ 6న మంగళ్‌హాట్ ప్రాంతం వైపు ఆటోలో ప్రయాణిస్తుండగా పోలీసులు అదుపులోకి తీసుకున్నారు.

30 కేసుల్లో నిందితురాలు.. 13 కేసుల్లో పరారీ

పోలీసుల విచారణలో విస్తుపోయే విషయాలు వెలుగులోకి వచ్చాయి. 2017 నుంచి 2026 వరకు నిందితురాలితో పాటు ఆమె కుటుంబ సభ్యులపై వివిధ పోలీస్ స్టేషన్లు, ఎక్సైజ్ విభాగాల్లో సుమారు 30 ఎన్డీపీఎస్, ఎక్సైజ్ కేసులు నమోదైనట్లు అధికారులు వెల్లడించారు. వీటిలో 13 కేసులకు సంబంధించి ఆమె పరారీలో ఉన్నట్లు తెలిపారు. గతంలో పలుమార్లు అరెస్టయి బెయిల్‌పై బయటకు వచ్చినప్పటికీ గంజాయి వ్యాపారాన్ని కొనసాగించినట్లు ఆరోపించారు.

గతంలో భారీగా గంజాయి, నగదు పట్టివేత

2023 ఆగస్టులో నిందితురాలి కుమారుడి నుంచి 22 కిలోల గంజాయిని పోలీసులు స్వాధీనం చేసుకున్నారు. అనంతరం కుటుంబానికి సంబంధించిన ఆస్తుల్లో సుమారు రూ.40 లక్షల నగదును గుర్తించారు. అదే ఏడాది అక్టోబర్‌లో గచ్చిబౌలి పోలీసులు 7.5 కిలోల గంజాయితో పాటు రూ.5 లక్షల నగదును పట్టుకున్నారు. 2024 మార్చిలో మరోసారి 22 కిలోల గంజాయి, రూ.22 లక్షల నగదు స్వాధీనం చేసుకున్నారు.

కోట్ల విలువైన ఆస్తులపై విచారణ

గంజాయి విక్రయాల ద్వారా అక్రమంగా ఆస్తులు కూడబెట్టినట్లు అనుమానిస్తున్న పోలీసులు వాటిపై ప్రత్యేకంగా దృష్టి సారించారు. లంగర్‌హౌస్‌లో రెండు జీ+3 భవనాలు, గచ్చిబౌలిలో ఒక జీ+2 భవనం, నానక్‌రామ్‌గూడలోని నివాస నిర్మాణాలపై విచారణ చేపట్టారు. గతంలో నిందితురాలు, ఆమె కుటుంబ సభ్యులు, కుటుంబానికి చెందిన జయలక్ష్మి కిరాణా అండ్ జనరల్ స్టోర్ బ్యాంకు ఖాతాలను కూడా స్తంభింపజేసినట్లు అధికారులు వెల్లడించారు.

ఫోన్ వినియోగం తగ్గించి.. ఇళ్లు మారుస్తూ తప్పించుకునే యత్నం

పోలీసుల నిఘా నుంచి తప్పించుకునేందుకు నిందితురాలు నానక్‌రామ్‌గూడ, గచ్చిబౌలి, లంగర్‌హౌస్ ప్రాంతాల్లో తరచూ నివాసాలు మారుస్తూ, మొబైల్ ఫోన్ వినియోగాన్ని సైతం తగ్గించినట్లు పోలీసులు తెలిపారు. అయినప్పటికీ ఈగల్ ఫోర్స్ టెక్నికల్ టీమ్ ప్రత్యేక నిఘా, సమాచార సేకరణతో ఆమె ఆచూకీ గుర్తించి అరెస్ట్ చేసింది.

ఆమె వద్ద నుంచి రూ.1,59,500 నగదు, ఒక మొబైల్ ఫోన్‌ను స్వాధీనం చేసుకున్నారు. అనంతరం తదుపరి చట్టపరమైన చర్యల నిమిత్తం నిందితురాలిని సైబరాబాద్ నార్కోటిక్స్ పోలీస్ స్టేషన్‌కు అప్పగించారు.

ప్రస్తుతం గంజాయి సరఫరాదారులు, ఈ అక్రమ వ్యాపారానికి సహకరించిన వ్యక్తులు, ఆర్థిక లావాదేవీలు, ఆస్తుల మూలాలపై పోలీసులు మరింత లోతుగా దర్యాప్తు చేస్తున్నారు.

మాదకద్రవ్యాలపై సమాచారం ఇవ్వండి: ఈగల్ ఫోర్స్

యువత మాదకద్రవ్యాలకు దూరంగా ఉండాలని, తల్లిదండ్రులు తమ పిల్లల నడవడికపై ప్రత్యేక శ్రద్ధ వహించాలని తెలంగాణ ఈగల్ ఫోర్స్ సూచించింది. గంజాయి, ఇతర మాదకద్రవ్యాల అక్రమ విక్రయాలకు సంబంధించిన సమాచారం తెలిస్తే వెంటనే పోలీసులకు తెలియజేయాలని కోరింది.